मुंबई : जागतिक बाजारातील महागाईचे कारण पुढे करून पेट्रोलियम कंपन्यांनी इंधन दरवाढीचा सपाटा लावला आहे. २०२१ च्या पहिल्या महिन्यात पेट्रोल आणि डिझेलमध्ये आठ वेळा दरवाढ झाली आहे. यात पेट्रोल आणि डिझेल सरासरी २ रुपयांनी महागले आहे. आज रविवारी कंपन्यांनी इंधन दर स्थिर ठेवले आहेत. आज पेट्रोल आणि डिझेलमध्ये कोणताही बदल झाला नाही. सलग दुसऱ्या दिवशी इंधन दरात कोणताही बदल झालेला नाही. याआधी शुक्रवारी दोन्ही इंधनात २५ पैशांची वाढ झाली होती. मुंबईत पेट्रोल ९२ रुपयांवर गेले आहे. मुंबईत एक लीटर पेट्रोलचा भाव ९२.२८ रुपये आहे. एक लीटर डिझेलसाठी मुंबईतील ग्राहकांना ८२.६६ रुपये मोजावे लागतील. दिल्लीत आजचा पेट्रोलचा भाव ८५.७० रुपये झाला आहे. डिझेलचा भाव ७५.८८ रुपये आहे. चेन्नईत देखील आज पेट्रोलचा भाव ८८.२९ रुपये असून डिझेल ८१.१४ रुपये आहे. कोलकात्यात एक लिटर पेट्रोलचा भाव ८७.११ रुपये असून डिझेल ७९.४८ रुपये आहे. बंगळुरात आज एक लीटर पेट्रोलचा भाव ८८.२० रुपये असून डिझेलचा भाव ८१.०३ रुपये आहे. वाचा : जागतिक बाजारात कच्च्या तेलाच्या दरात किंचित घसरण झाल्याचे दिसून आले. कच्च्या तेलाच्या किमतीत शुक्रवारी ०.८६ डॉलरची घसरण झाली. तेलाचा भाव प्रती बॅरल ५२.२७ डॉलर झाला. तर ब्रेंट क्रूडचा भाव ०.६९ डॉलरची घसरण झाली आणि तो ५५.४१ डॉलर झाला. मागील दोन महिन्यात देशांतर्गत इंधन मागणीत वाढ झाली आहे. करोना संकटात लॉकडाउनमुळे वाहतुकीवर निर्बंध होते. हे निर्बंध आता शिथिल करण्यात आले आहेत. अर्थव्यवस्था झपाट्याने पूर्वपदावर येत असून पेट्रोल आणि डिझेल मागणी करोनापूर्व काळापर्यंत पोहोचली आहे. गेल्या वर्षातील दुसऱ्या सहामाहीत पेट्रोलमध्ये सरासरी १५ रुपयांची वाढ झाली आहे. तर डिझेल १३ रुपयांनी महागले आहे.
