अलीगढ: अश्लील व्हिडिओ व्हायरल करण्याची धमकी देत, मित्राच्या घरी बोलावून घेतलेल्या महिलेवर केल्याची धक्कादायक घटना अलीगढमध्ये घडली आहे. पीडित महिला ही हाथरसच्या हसायन परिसरातील राहणारी आहे. जुना वाद मिटवण्याच्या बहाण्याने आरोपीने त्याच्या मित्राच्या घरी बोलावले होते. तिथे बलात्कार केला, असा आरोप पीडितेने केला आहे. या प्रकरणी पीडित महिलेने पोलीस ठाण्यात पाच जणांविरोधात तक्रार दाखल केली आहे. पीडितेच्या तक्रारीनुसार, २० जानेवारी रोजी महिलेला गावातीलच पप्पू नावाच्या तरुणाचा फोन आला. घराबाहेर कार उभी केली आहे, त्यात बसून अलीगढला ये, असे त्याने फोनवरून सांगितले. त्यास नकार दिल्यानंतर मोबाइलमध्ये चित्रीत केलेला अश्लील व्हिडिओ व्हायरल करण्याची धमकी त्याने दिली. त्यामुळे बदनामीच्या भीतीने ती कारमध्ये बसून अलीगढला आली. अलीगढला पोहोचल्यानंतर पप्पू एका बसथांब्यावर भेटला. मित्राच्या घरी जाऊया, तेथेच बोलूया, असे तो म्हणाला. तिथे आधीच पप्पूचे मित्र दीपक, सुशील, राहुल आणि देवकार हे होते. त्यानंतर पप्पू आणि त्याच्या मित्रांनी सामूहिक बलात्कार केला, असे पीडितेने तक्रारीत नमूद केले आहे. घटनेनंतर आरोपींनी कुटुंबीयांना जीवे मारण्याची धमकी दिली. तसेच व्हिडिओ सोशल मीडियावर व्हायरल करण्याची धमकी दिली. याआधीही आरोपींनी तिच्या पतीला आणि कुटुंबीयांना मारहाण केली होती. दरम्यान, घटनेनंतर आरोपींनी तिला एका बसथांब्यावर सोडले. महिलेने या घटनेची माहिती तिच्या पतीला दिली. तिचा पती दिल्लीहून घरी आला. त्यांनी पोलीस ठाण्यात तक्रार दाखल केली. तिच्या तक्रारीवरून पोलिसांनी पाच जणांविरोधात गुन्हा दाखल केला आहे.
