म. टा. प्रतिनिधी, पिंपरी: सासू आणि सासऱ्याला चार जण मारहाण करत असताना भांडणे सोडविण्यासाठी गेलेल्या जावयाला मारहाण करण्यात आली. विळा आणि कुऱ्हाडीने मारून जखमी केले. जावयाच्या दुचाकीची तोडफोड करून नुकसान केले. रसरंग चौक, येथे रविवारी (२४ जानेवारी) ही घटना घडली. रावसाहेब अण्णा काकडे, साहेबराव अण्णा काकडे, रामदास भीमा काकडे आणि लखन भीमा काकडे (सर्व रा. रसरंग चौक, पिंपरी) अशी गुन्हा दाखल झालेल्यांची नावे आहेत. याबाबत बाबासाहेब रामदास गायकवाड (वय २३, रा. बराड वस्ती, ता. आंबेगाव) यांनी पिंपरी पोलिस ठाण्यात फिर्याद दिली आहे. आरोपी फिर्यादी यांचे सासरे दगडू अण्णा काकडे आणि सासू सिंधूबाई दगडू काकडे यांना मारहाण करत होते. त्यामुळे फिर्यादी भांडण सोडिवण्यासाठी गेले. त्याचा राग आल्याने आरोपींनी फिर्यादीला जखमी केले. त्यानंतर फिर्यादीच्या दुचाकीची तोडफोड करून नुकसान केले. अल्पवयीन मुलीसोबत अश्लील चाळे पिंपरी : अभ्यासासाठी आलेल्या अल्पवयीन मुलीसोबत अश्लील चाळे केल्याप्रकरणी गुन्हा दाखल करण्यात आला आहे. भोसरी येथे मंगळवारी (२० जानेवारी) रात्री साडेआठच्या सुमारास हा प्रकार घडला. अमितकुमार श्रीमल शाह (वय ३२, रा. भोसरी) असे आरोपीचे नाव आहे. याबाबत पीडित मुलीच्या २८ वर्षीय महिलेने एमआयडीसी भोसरी पोलिस ठाण्यात फिर्याद दिली आहे. फिर्यादी महिलेची १२ वर्षीय भाची तिच्या मैत्रिणीसोबत आरोपीच्या घरी शिकवणी व अभ्यासासाठी गेली होती. त्यावेळी आरोपीने पीडित मुलीसोबत अश्लील चाळे केले. मुलगी मोठ्याने ओरडली असता तिच्या पाठीत बुक्की मारली. 'कुणाला काही सांगू नको,' अशी धमकी दिली. गुंतवणुकीच्या अमिषाने फसवणूक पिंपरी: 'ट्रेड मनी' या व्यवसायात पैसे गुंतवण्यास सांगून त्यातून चांगला परतावा देण्याचे आमिष दाखवून फसवण्यात आले. या प्रकरणी चार जणांच्या विरोधात गुन्हा दाखल करण्यात आला आहे. हॉटेल सिल्व्हर सेव्हन, आकुर्डी येथे २१ ते २६ जानेवारी दरम्यान हा प्रकार घडला. मनोज हणमंत सुतार (वय ३५, रा. नेवाळे वस्ती, चिखली) यांनी याबाबत निगडी पोलिस ठाण्यात फिर्याद दिली आहे. त्यानुसार राजकुमार मनोहर सिंग, राहुल हरिशंकर तिवारी (दोघे रा. कांदिवली इस्ट, मुंबई), उत्सव सावंत, संतोष सुतार (रा. प्राधिकरण, निगडी) अशी गुन्हा दाखल झालेल्यांची नावे आहेत. आरोपींनी 'ट्रेड मनी' या व्यवसायात पैसे गुंतवणूक करण्याचे आमिष दाखवले. तसेच, त्यातून चांगला परतावा देण्याचेही आरोपींनी सांगितले. मात्र, पैसे गुंतवण्यास सांगून चांगला परतावा न देता आरोपींनी फिर्यादी व अन्य काही लोकांची आर्थिक फसवणूक केली. पुढील तपास निगडी पोलिस करत आहेत.
