मुंबई : शेअर बाजारात विक्रीचा सपाटा सुरूच आहे. करोनाच्या सावटाखाली मांडले जाणारे बजेट कसे असेल, सरकार आर्थिक आघाडीवर कसे नियोजन करणार याबाबत साशंकता असल्याने गुंतवणूकदारांनी भांडवली बाजारातून पैसे काढून घेण्याला प्राधान्य दिले आहे. आज सलग चौथ्या सत्रात सेन्सेक्स आणि निफ्टीत मोठी पडझड झाली आहे. आजच्या घसरणीनंतर सेन्सेक्स ४७ हजार अंकांखाली आला. गेल्याच आठवड्यात गुरुवारी सेन्सेक्सने ५० हजारांचा टप्पा ओलांडला होता. आजच्या सत्रात ऑटोमोबाईल, बँका, एफएमसीजी, फार्मा या क्षेत्रात विक्रीचा जोर आहे. सेन्सेक्स मंचावरील ३० पैकी २७ शेअर घसरले आहेत. तर ओएनजीसी, एनटीपीसी आणि रिलायन्स इंडस्ट्रीज या शेअरमध्ये किरकोळ वाढ आहे. एचयूएल, भारती एअरटेल, एशियन पेंट्स, अल्ट्राटेक सिमेंट, महिंद्रा अँड महिंद्रा, बजाज फायनान्स, बजाज फिनसर्व्ह, इंडसइंड बँक, टीसीएस, एसबीआय, डॉ. रेड्डीज लॅब या शेअरमध्ये घसरण झाली आहे. सध्या सेन्सेक्स ३७४ अंकांच्या घसरणीसह ४७०१६ अंकावर आहे. तर निफ्टीत १०७ अंकांची घसरण झाली असून १३८५८ अंकांवर आहे. बड्या काॅर्पोरेट्सकडून तिमाही निकाल जाहीर करण्यात त्यात आहे. करोनाने अर्थव्यवस्थेचे आणि कंपन्यांचे किती नुकसान झाले याबाबत सध्या गुंतणूकदार चिंतेत आहे. त्यामुळे बाजारात चौफेर विक्री दिसून येत असल्याचे शेअर दलालांचे म्हणणे आहे. आजच्या सत्रात गुंतवणूकदारांचे किमान ८० हजार कोटीचे नुकसान झाले आहे. बुधवारी सेन्सेक्स ९३७ अंकांनी कोसळला होता. तर निफ्टीत २७१ अंकांची घसरण झाली होती. यात गुंतवणूकदार दोन लाख कोटींनी पोळले होते. अमेरिकन शेअर बाजारात बुधवारी २ टक्के घसरण झाली. डाऊजोन्स ६३४ अंकांनी कोसळला. मागील तीन महिन्यातील सर्वात मोठी घसरण अमेरिकन शेअर बाजारांनी अनुभवली. मागील आठवड्याच्या शेवटच्या दोन सत्रात नफा वसुली झाल्याने आणि निफ्टी या दोन्ही निर्देशांकांत घसरण झाली. मेटल आणि वित्तीय शेअर्सच्या विक्रीने बाजाराने घसरण अनुभवली. शुक्रवारी निफ्टी २१८.४५ अंकांनी खाली घसरला व १४४९९ पातळीच्या खाली १४,३७१.९० अंकांवर स्थिरावला. एसअँडपी बीएसई सेन्सेक्स ७४६.२२ अंकांनी घटून ४८८७८.५४ अंकांवर स्थिरावला होता. तर सोमवारी सेन्सेक्समध्ये ५३० अंकांची घसरण झाली होती.
