जिनेव्हा: मागील २०२० हे वर्ष करोनाच्या संकटाशी दोन करण्यात गेल्यानंतर आता नव्या वर्षात चांगली बातमी समोर आली आहे. जागतिक आरोग्य संघटनेने फायजर-बायोएनटेकने विकसित केलेल्या लशीला मंजुरी दिली आहे. करोनाला अटकाव करण्यासाठी जागतिक आरोग्य संघटनेकडून पहिल्यांदाच एखाद्या लशीला मान्यता देण्यात आली आहे. जागतिक आरोग्य संघटनेच्या या मंजुरीनंतर आता लशीच्या वापरासाठी जागतिक पातळीवर मार्ग खुला झाला आहे. याआधीच काही देशांनी फायजर-बायोएनटेकच्या लशीला मंजुरी दिली आहे. फायजरच्या लशीला जागतिक आरोग्य संघटनेने मंजुरी दिल्यामुळे ही लस गरीब देशांनाही उपलब्ध होण्याची शक्यता आहे. आतापर्यंत ही लस अमेरिका आणि युरोपमध्येच उपलब्ध आहे. वाचा: वाचा: जागतिक आरोग्य संघटनेने म्हटले की, फायजरच्या लशीला आपात्कालीन वापरासाठी मंजुरी दिल्यामुळे लस आयात करणे आणि लस वापरासाठी संबंधित देशातील नियामक प्राधिकरणांच्या मंजुरी प्रक्रियेला गती देण्याचा प्रयत्न आहे. जागतिक आरोग्य संघटनेने ठरवलेले निकषांची पूर्तता फाजयर-बायोएनटेकची लस करत असल्याचे त्यांनी सांगितले. फायजर-बायोएनटेकच्या लशीला ब्रिटन, अमेरिका, युरोपीयन महासंघासह अनेक देशांनी मंजुरी दिली आहे. वाचा: वाचा: दरम्यान, जगात पहिल्यांदा करोना संसर्गाचा फैलाव सुरू झालेल्या चीनने अखेर आपल्या लशीला सशर्त मान्यता दिली आहे. चीनने सिनोफार्म कंपनीने विकसित केलेल्या लशीला मंजुरी दिली. करोनाचा फैलाव सुरू झाल्यानंतर काही लशींची चाचणी सुरू झाली होती. वैद्यकीय उत्पादन प्रशासन उपायुक्त चेन शिफेई यांनी सांगितले की, लशीला बुधवारी रात्री मंजुरी देण्यात आली. 'बीजिंग इन्स्टिट्यूट ऑफ बायोलॉजिकल प्रोडक्ट'ने निर्मिती केलेली लस देण्यात येणार आहे. या कंपनीला चीन सरकारकडून अनुदान देण्यात येते. करोनापासून बचाव होण्यासाठी लशीचे दोन डोस घ्यावे लागणार आहेत. ही लस ७९.३ टक्के प्रभावी असल्याचे चाचणीत आढळून आल्याची माहिती कंपनीच्यावतीने दिली. जगभरात लस स्पर्धेत असलेल्या कंपनीपैकी सिनोफार्म ही महत्त्वाची कंपनी आहे.
