म.टा. प्रतिनिधी, 'शिवराय मनामनात, घराघरात' हा गेल्या काही वर्षांपासून रुजलेला नारा यंदा कटाक्षाने पाळण्याची गरज आहे. करोनाचे वाढते संक्रमण पाहता शिवभक्तांनी आपापल्या घरात जयंती साजरी करावी. तसेच शहरात होणाऱ्या विविध सार्वजनिक उपक्रमांना हजेरी लावताना सुरक्षित वावर जोपासण्याची काळजी घेण्याचे आवाहन विविध संघटनांद्वारे करण्यात येत आहे. यंदा करोनामुळे शिवजयंतीच्या जल्लोषावर बंधने आली आहेत. सरकारनेही यासंदर्भात नियमावली जाहीर केली आहे. ती पाळायची की नाही, हा वाद कायम असला तरी सार्वजनिकस्थळी होणाऱ्या कार्यक्रमांमध्ये आवश्यक ती काळजी घेण्याचे आवाहन सर्व आयोजकांकडून करण्यात आले आहे. उपराजधानीतील शिवतीर्थ अशी ओळख असलेल्या महालातील चौकातील महाराजांच्या पुतळ्याला श्री शिवराज्याभिषेक सोहळा समितीतर्फे दुग्धाभिषेक करण्यात येणार आहे. माल्यार्पण करून कोव्हिड योद्ध्यांद्वारे महाआरती होईल. सकाळी ६ वाजता सुरू होणाऱ्या कार्यक्रमाला कोतवाली पोलिस स्टेशनचे निरीक्षक भोसले, गणेशपेठ पोलिस स्टेशनचे निरीक्षक भारत क्षीरसागर, डॉ. संदीप आकरे, डॉ. श्रुती आष्टनकर, नीलेश देशमुख, सचिन कुंभारे उपस्थित राहणार आहेत. शंभुराजे प्रतिष्ठानतर्फे शिवजयंतीनिमित्त शहीद जवानांचे कुटुंबीय आणि आंतरराष्ट्रीय खेळाडूंचा सत्कार धनवटे नॅशनल कॉलेज येथे करण्यात येणार आहे. हिंदवी स्वराज्य प्रतिष्ठानतर्फे विविध स्पर्धांसह नीरज दोंत्तुलवार यांचे व्याख्यान चामट चौकातील राम मंदिरात आयोजित करण्यात आले आहे. विद्यापीठाचे ऑनलाइन व्याख्यान राष्ट्रसंत तुकडोजी महाराज नागपूर विद्यापीठाद्वारे शिवजयंतीनिमित्त अमरावती येथील श्री शिवाजी कला व वाणिज्य महाविद्यालयाच्या प्राचार्य डॉ. स्मिता देशमुख यांचे व्याख्यान आयोजित केले आहे. व्याख्यान ऑनलाइन असून https://www.youtube.com/c/RashtrasantTukadojiMaharajNagpurUniversity या लिंकवर थेट प्रक्षेपण होणार आहे.
