अमरोहा: प्रियकराच्या मदतीने आपल्याच कुटुंबातील सात जणांची निर्घृण हत्या करणाऱ्या शबनमने राज्यपाल आनंदीबेन पटेल यांच्याकडे दयेचा अर्ज केला आहे. यावेळी दयेचा अर्ज मंजूर केला जाईल, अशी शबनमला आशा आहे. यापूर्वी सुप्रीम कोर्ट आणि राष्ट्रपतींनी दया याचिका फेटाळली आहे. मात्र, या हत्याकांडातील दोषी शबनम आणि सलीमकडे अजूनही काही पर्याय उपलब्ध आहेत. या हत्याकांड प्रकरणात अमरोहाच्या जिल्हा कोर्टाने २०१०मध्ये शबनम आणि सलीम या दोघांना फाशीची शिक्षा सुनावली होती. सुप्रीम कोर्टात हे प्रकरण गेले असता, कनिष्ठ न्यायालयाचा निर्णय कायम ठेवला. माजी राष्ट्रपतींनीही ११ ऑगस्ट २०१६ रोजी शबनमच्या दयेचा अर्ज फेटाळला होता. सन २०१९मध्ये सुप्रीम कोर्टात शबनमच्या फाशीच्या शिक्षेची पुनर्विचार याचिकाही फेटाळण्यात आली होती. सध्या शबनम ही रामपूर तुरुंगात आहे. आता शबनमने राज्यपालांकडे दयेचा अर्ज केला आहे. राज्यपालांच्या माध्यमातून राष्ट्रपतींकडे याचिका पाठवली आहे. तिच्या मुलानेही राष्ट्रपतींकडे दयेची विनंती केली आहे. शबनमचा मुलगा अल्पवयीन असून, तो तिला भेटण्यासाठी तुरुंगात जात असतो. सुप्रीम कोर्टाने फाशीची शिक्षा सुनावल्यानंतर, संबंधित आरोपी राष्ट्रपती कार्यालय किंवा गृह मंत्रालयाकडे दयेचा अर्ज करू शकतो. याशिवाय संबंधित राज्याच्या राज्यपालांकडेही दयेचा अर्ज करू शकतो. राज्यपाल आपल्याकडे आलेला दयेचा अर्ज गृह मंत्रालयाकडे पाठवतात. पहिल्यांदाच महिला आरोपीला होणार फाशी राष्ट्रपतींकडून दयेचा अर्ज मंजूर केला जाऊ शकतो, अशी शबनमला अजूनही अपेक्षा आहे. जर राष्ट्रपतींनी पुनर्विचार याचिकेवर निर्णय कायम ठेवल्यास शबनम ही फाशी होणारी स्वातंत्र्यानंतर देशातील पहिली महिला ठरणार आहे. दुसरीकडे, शबनमच्या फाशीची तयारी मथुरा तुरुंगात सुरू करण्यात आली आहे. मात्र, तुरुंग प्रशासनाने अशी कोणतीच माहिती आमच्याकडे नसल्याचे स्पष्ट केले आहे.
