ब्रिस्टल: इंग्लंडमधील ब्रिस्टलमध्ये रविवारी संध्याकाळी शांततेत आंदोलन पार पडल्यानंतर अचानक हिंसाचार उफाळून आला. आंदोलकांनी सिटी सेंटर येथील पोलीस ठाण्यावर हल्ला केला. यामध्ये दोन पोलीस अधिकारी गंभीर जखमी झाले आहेत. तर, पोलिसांच्या दोन वाहनांना आग लावण्यात आली. कोविडबाबतचे निर्देश झुगारून हजारो आंदोलनकर्ते रस्त्यावर आले होते. संसदेत सादर होणाऱ्या एका विधेयकाविरोधात हे आंदोलन करण्यात आले होते. या विधेयकानुसार, रस्त्यांवर होणारी आंदोलने रोखण्यास, त्यांना मनाई करण्यासाठी पोलिसांना नवीन अधिकार देण्यात आले आहे. या विधेयकाविरोधात पुकारण्यात आलेले आंदोलन शांततेत सुरू होते. आंदोलन संपल्यानंतर मात्र, जमाव अचानक आक्रमक झाला आणि हिंसाचार झाला असल्याची माहिती पोलिसांनी दिली. वाचा: ब्रिटनच्या गृहमंत्री प्रीति पटेल यांनी पोलिसांवर झालेल्या हल्ल्याचा निषेध केला. त्यांनी ट्विट करून सांगितले की, ब्रिस्टलमध्ये आज रात्री धक्कादायक चित्र दिसले. लूटपाट, हिंसाचाराच्या घटना सहन केल्या जाणार नसल्याचे त्यांनी म्हटले. या हल्ल्यात जखमी झालेल्या पोलिसांच्या प्रकृतीत लवकर सुधारणा होवो, असेही त्यांनी म्हटले. वाचा: या हल्ल्यात दोन पोलीस अधिकारी जखमी झाले असून त्यांची प्रकृती गंभीर आहे. परिस्थितीवर नियंत्रण मिळवण्यासाठी इतर ठिकाणांहूनही मदत मागवण्यात आली आहे. सिटी सेंटरमध्ये जमावाने हल्ला करत पोलीस स्टेशनबाहेर जाळपोळ आणि तोडफोड केली. या दरम्यान शेकडोंच्या संख्येने आंदोलक रस्त्यावर उतरले होते. स्थानिक बीएलएम समुदायाने या आंदोलनाचे आयोजन केले होते. वाचा: या हिंसाचाराचे व्हिडिओ सोशल मीडियावर व्हायरल होत आहे. हिंसक जमावाने पोलीस ठाण्याच्या काचा तोडून पोलिसांवर हल्ला केला. पोलिसांच्या वाहनाला आग लावली. पोलिसांवर स्फोटके फेकली गेली असल्याचा दावा करण्यात येत आहे
