म. टा. वृत्तसेवा, डॉ. शीतल आमटे मृत्यू प्रकरणातील इलेक्ट्रॉनिक वस्तूंमध्ये नेमके काय दडलय हे शोधून काढण्यात मुंबई सायबर विभागाला अपयश आले. त्यामुळे आता परीक्षणाकामी पुणे येथे सायबर विभागाकडे त्या वस्तू पाठविण्यात आल्याची माहिती पोलिस सूत्रांच्या वरिष्ठ अधिकाऱ्यांनी दिली आहे. दरम्यान, येत्या मंगळवारी डॉ. शीतल आमटे यांच्या मृत्यूला चार महिने पूर्ण होत आहेत. येथील महारोगी सेवा समितीच्या मुख्य कार्यकारी अधिकारी डॉ. शीतल आमटे यांनी आनंदवनातील आपल्या राहत्या निवासस्थानी आत्महत्या केल्याची धक्कादायक घटना ३० नोव्हेंबरला घडली होती. शवविच्छेदनाच्या प्राथमिक अहवालात श्वास अडकल्याने त्यांचा मृत्यू झाला असल्याचे यापूर्वीच समोर आले आहे. पोलिस तपास सुरू असून तपासात घातपात झाल्याचा प्रथमदर्शनी पुरावा दिसलेला नाही. पोलिसांना सायबर व फॉरेन्सिक अहवालाची प्रतीक्षा होती. फॉरेन्सिक अहवालाबाबत अद्यापही काहीही स्पष्ट झालेले नाही. घटनास्थळावरून जप्त ३ मोबाइल, एक लॅपटॉप,१ टँबलेट हे परीक्षणाकामी न्यायसहायक वैज्ञानिक प्रयोगशाळा मुंबई या ठिकाणी पाठविण्यात आले होते. इलेक्ट्रॉनिक वस्तूंपैकी केवळ एका 'आयपॅड' लाच डॉ. आमटे यांनी पासवर्ड म्हणून स्वतःचे डोळे ठेवले होते. पण उर्वरित वस्तूंना साधा पासवर्ड होता अशी माहिती आहे. परिणामी स्वतःचे डोळे ठेवलेल्या 'आयपॅड' मधील 'डाटा' घेऊन माहिती हुडकून काढणे तज्ज्ञांनाही कठीण जाणार नाही असे मानले जात होते. पण त्यात यश न आल्याने सदर वस्तू परीक्षणाकामी पुणे येथे सायबर विभागाकडे पाठविण्यात आल्याची माहिती पोलिस सूत्रांच्या वरिष्ठ अधिकाऱ्यांनी 'मटा'शी बोलताना दिली. अखेरच्या काळातील त्यांचे लिखाण, व्हिडीओ, टिपण, संदेश पोलिसांच्या तपासाच्या दृष्टीने महत्वाचे ठरणार आहे, असे मानले जात आहे.
