भोपाळ: मध्य प्रदेशातील भोपाळमध्ये अयोध्या नगर बायपास परिसरात एका आठ वर्षीय मुलीवर बलात्कार करण्यात आल्याची धक्कादायक घटना उघडकीस आली आहे. आरोपीने नगरपालिकेच्या कचरा डेपोच्या पाठिमागे नेऊन तिच्यावर अत्याचार केले. या घटनेची कुठेही वाच्यता करू नये यासाठी तिला पाच रुपये दिले. पीडितेने दिलेल्या माहितीच्या आधारे आरोपीची ओळख पटवण्यात आली आहे. आरोपीला अटक करण्यासाठी पोलिसांची आठ पथके नेमण्यात आली आहेत. त्यानंतर त्याचे रेखाचित्र तयार करण्यात आले आहे. यावरून संशयिताला ताब्यात घेतले आहे. आरोपीचे लग्न झालेले असून, त्याची पत्नी वर्षभरापूर्वी त्याला सोडून गेली आहे. संशयित आरोपी गुजरातला पळून जाण्याच्या प्रयत्नात होता. त्याचवेळी त्याला अटक करण्यात आली. पोलिसांनी दिलेल्या माहितीनुसार, पीडितेचा जबाब नोंदवला आहे. ती आपल्या घराजवळ दुपारच्या सुमारास खेळत होती. आरोपीने तिला तंबाखू आणण्यासाठी शंभर रुपये दिले. पीडिता दुकानात गेली आणि तिने त्याच्यासाठी तंबाखू आणली. कचऱ्याच्या डेपोमागे असलेल्या व्यक्तीला ती देऊन ये असे आरोपीने तिला सांगितले. मुलगी त्याच्या सांगण्यावरून तिकडे गेली. आरोपीने तिचा पाठलाग केला आणि तिला झुडपात नेले. तिथे तिच्यावर बलात्कार केला. मुलगी रडत रडत घरी गेली आणि आपल्या आजोबांना सर्व हकिकत सांगितली. ते तिला घेऊन अयोध्या नगर पोलीस ठाण्यात गेले आणि आरोपीविरोधात तक्रार दाखल केली. पोलिसांनी आरोपीविरोधात गुन्हा दाखल केला आणि आरोपीचा शोध सुरू केला. या घटनेने पीडितेला मोठा मानसिक धक्का बसला आहे. तिची प्रकृती स्थिर असल्याचे पोलिसांनी सांगितले.
