मुंबई : आज भांडवली बाजारात मोठी घसरण पाहायला मिळाली. गेल्या चार सत्रात वधारलेल्या शेअरमध्ये करत नफेखोरांनी संधी साधली. त्यामुळे आज शुक्रवारी सेन्सेक्स ३८० अंकांनी घसरला तर राष्ट्रीय शेअर बाजाराचा निफ्टी ९५ अंकांनी घसरला. सध्या बाजारात बँकिंग, वित्तीय सेवा, फार्मा, आयटी या क्षेत्रात विक्रीचा सपाटा सुरु आहे. आजच्या सत्रात रिलायन्स इंडस्ट्रीज, एचडीएफसी, एचडीएफसी बँक, आयसीआयसीआय बँक, कोटक महिंद्रा बँक, एसबीआय या शेअरमध्ये घसरण झाली. दुसरीकडे निफ्टी बँक इंडेस्कवर पीएनबी बँक, बँक ऑफ बडोदा, आयडीएफसी बँक, ऍक्सिस बँक, इंड्सइंड बँक, बंधन बँक आदी शेअर वधारले आहेत. जागतिक बाजारातील घडामोडींचे पडसाद भारतीय बाजारावर उमटत असतात. त्यामुळे तिथे काही घडले तर त्याचे परिणाम भारतीय बाजारांवर दिसून येतात, असे जिओजित फायनान्शिअल सर्व्हिसेसचे व्ही. के विजयकुमार यांनी सांगितले. देशात दररोज तीन लाखांहून अधिक रुग्ण आढळून येत आहेत. ही देखील गुंतवणूकदारांसाठी चिंतेची बाब असल्याचे त्यांनी सांगितले. सध्या सेन्सेक्स ४७६ अंकांनी घसरला असून तो ४९२८९ अंकावर आहे. तर निफ्टी १२० अंकांनी कोसळला असून तो १४७७४ अंकावर आहे. १४२२ शेअर तेजीत आहेत तर ११३४ शेअर घसरले आहेत. चलन बाजारात रुपया डॉलरसमोर ७४.०४ वर स्थिर आहे. शेअर बाजाराच्या आकडेवारीनुसार गुरुवारी परदेशी गुंतवणूकदारांनी ८०९ कोटीचे शेअर खरेदी केले. तर स्थानिक संस्थात्मक गुंतवणूकदारांनी ९४२ कोटीचे शेअर विक्री केले. देशात सुरू असलेल्या लसीकरण मोहिमेला जोर देत बुधवारपासून १८ वर्षांवरील व्यक्तींना लसीकरण मोहिमेत सहभागी होण्यासाठी नावनोंदणी सुरू करण्यात आलीय. पहिल्याच दिवशी १.३३ कोटींहून अधिक व्यक्तींनी लसीकरण मोहिमेत सहभागी होण्यासाठी आपलं नाव नोंदवलं आहे. याच दिवशी (बुधवारी, २९ एप्रिल २०२१) रोजी एकूण ३ लाख ७९ हजार २५७ करोनाबाधित रुग्ण आढळले आहेत तर याच २४ तासांत ३६४५ जणांना आपले प्राण गमवावे लागले आहेत. याच दिवशी तब्बल २ लाख ६९ हजार ५०७ रुग्णांना रुग्णालयातून डिस्चार्ज देण्यात आल्याची माहिती आरोग्य मंत्रालायकडून देण्यात आलीय.
