मुंबई : पेट्रोलियम कंपन्यांनी सुरु ठेवलेल्या इंधन दरवाढीने पुन्हा एकदा देशात महागाईचा भडका उडण्याची शक्यता आहे. आज बुधवारी कंपन्यांनी पेट्रोल आणि डिझेल दरात वाढ केली. सलग तिसऱ्या दिवशी इंधन दरवाढीनंतर मुंबईत पेट्रोल शंभरीच्या उंबरठ्यावर पोहोचले आहे. आज देशभरात पेट्रोल आणि डिझेल प्रत्येकी २५ पैशांनी महागले आहे. त्याआधी गेल्या आठवड्यात पेट्रोलियम कंपन्यांनी सलग चार दिवस इंधन दरवाढ केली होती. त्यानंतर दोन दिवस इंधन दर स्थिर ठेवले होते. आजच्या दरवाढीनंतर मुंबईत एक लीटर पेट्रोलचा भाव ९८.३६ रुपये झाला आहे. तर दिल्लीत पेट्रोल ९२.०५ रुपये झाले आहे. चेन्नईत एक लीटर पेट्रोलचा भाव ९८.८४ रुपये आहे. तर कोलकात्यात पेट्रोलचा भाव ९२.१६ रुपये झाला आहे. आज मुंबईत एक लीटर डिझेलचा भाव ८९.७५ रुपये झाला आहे. दिल्लीत डिझेलचा भाव ८२.६१ रुपये झाला आहे. चेन्नईत डिझेल ८७.४९ रुपये प्रती लीटर आहे. कोलकात्यात डिझेल ८५.४५ रुपये प्रती लीटर झाले आहे. गेल्या आठवड्यापासून सुरु असलेल्या दरवाढीने राजस्थान आणि मध्य प्रदेशातील काही शहरांमध्ये पेट्रोलने शंभरी ओलांडली आहे. दरम्यान जागतिक बाजारात कच्च्या तेलाच्या किमतीत मात्र तेजी कायम आहे. करोनाचा कहर आणि लॉकडाउन यामुळे भारतातील इंधन मागणी कमी झाली असली तरी युरोप आणि अमेरिकेत इंधन मागणीत वाढ झाली आहे. त्यामुळे अमेरिकनकमॉडिटी बाजारात ब्रेंट क्रूडचा भाव ०.१४ डॉलरच्या तेजीसह ६८.६९ डॉलर प्रती बॅरल झाला. तर डब्ल्यूटीआय क्रूडचा भाव ०.१९ डॉलरच्या तेजीसह ६५.४७ डॉलर प्रती बॅरल झाला. पश्चिम बंगाल, तामिळनाडू, केरळ, आसाम आणि पुद्दुचेरी या पाच राज्यांमधील विधानसभेच्या निवडणुकीमुळे पेट्रोलियम कंपन्यांनी तीन आठवडे इंधन दर स्थिर ठेवले होते. याच काळात जागतिक कमॉडिटी बाजारात मात्र ब्रेंट क्रूडचा भाव तेजीत होता. तसेच चलन बाजारात डॉलरच्या तुलनेत रुपयात अवमूल्यन झाले. ज्यामुळे इंधन आयात खर्चिक बनली.
