नवी दिल्ली : डॉमिनिका देशात अटक करण्यात आलेला हिरे व्यापारी आणि पीएनबी बँक घोटाळ्याचा सूत्रधार मेहुल चोक्सी याचे भारताकडील प्रत्यार्पण लांबण्याची शक्यता आहे. अँटिग्वा अँड बार्बुडा देशांच्या पंतप्रधानांनी चोक्सीला थेट भारताच्या स्वाधीन करण्याचा सल्ला डॉमिनिका सरकारला दिला आहे. तर डॉमिनिका सरकारने चोक्सीला भारताच्या स्वाधीन न करता पुन्हा अँटिग्वाकडे सोपवण्याची भूमिका घेतली आहे. जवळपास तीन वर्ष अँटिग्वामध्ये दडून बसलेला चोक्सी आता कायद्याच्या कचाट्यात सापडला आहे. चोक्सीने रविवारी अँटिग्वामधून पळ काढला होता. त्याला बुधवारी डॉमिनिकामध्ये पोलिसांनी अटक केली. सध्या तो डॉमिनिका पोलिसांच्या कस्टडीमध्ये आहे. चोक्सीच्या अटकेनंतर अँटिग्वा अँड बार्बुडा देशांच्या पंतप्रधानांनी चोक्सीला थेट भारताच्या स्वाधीन करण्याचा सल्ला डॉमिनिका सरकारला दिला होता. चोक्सीची डॉमिनिका पोलिसांकडून चौकशी केली जात आहे. दरम्यान, डॉमिनिकाच्या कोर्टात चोक्सीच्या वकिलांनी त्याला प्रत्यक्ष हजर होऊन बाजू मांडण्याची याचिका दाखल केली आहे. तर दुसऱ्या बाजूला चोक्सीला कायदेशीर मदत कोर्टाकडून नाकारण्यात आली आहे. देशात बेकायदेशीर प्रवेश केल्याचा ठपका मेहुल चोक्सीवर डॉमिनिका सरकारने ठेवला आहे. त्याला पुन्हा अँटिग्वा अँड बार्बुडा सरकारच्या स्वाधीन करावे हा डॉमिनिका सरकारचा सार्वभौम अधिकार असल्याचे कोर्टाने म्हटलं आहे. चोक्सीकडे अँटिग्वा अँड बार्बुडाचे नागरिकत्व आहे, असे कोर्टाने म्हटलं आहे. दरम्यान, चोक्सीच्या अटकेबाबत त्याच्या वकिलाने संशय व्यक्त केला आहे. चोक्सीला न्यायालयात हजर राहून बाजू मांडण्याची (a habeas corpus petition) संधी मिळावी, अशी विनंती करणारी याचिका चोक्सीच्या वकिलाकडून डॉमिनिकाच्या कोर्टात दाखल करण्यात आली आहे. चोक्सीचे अपहरण झाल्याचा दावा मेहुल चोक्सीने जॉली हार्बर येथून अपहरण झाल्याचा दावा चोक्सीचे वकील वेन मार्श यांनी केला आहे. अँटिग्वामधील जॉली हार्बर येथून एका भारतीय वंशाच्या व्यक्तीने चोक्सीला बोटीतून डॉमिनिका येथे आणले. यावेळी अँटिग्वाचे पोलीस देखील या बोटीवर होते. या दरम्यान चोक्सीला मारहाण झाली असून चोक्सीच्या अंगावर अनेक जखमा आहेत असे वकिलाने म्हटलं आहे. त्यामुळे चोक्सीच्या जीविताला धोका असल्याचे संशय वकिलाने न्यायालयात केला आहे. आता या प्रकरणी २८ मे रोजी डॉमिनिका न्यायालयात सुनावणी होणार आहे.
