वॉशिंग्टन/ रामल्लाह: इस्रायल आणि पॅलेस्टाइनमध्ये मागील सात दिवसांपासून संघर्ष सुरू आहे. इस्रायलकडून पॅलेस्टाइनवर हल्ले सुरू आहेत. तर, पॅलेस्टाइनमधील सशस्त्र गट हमासकडूनही रॉकेट हल्ले सुरू आहेत. याच दरम्यान अमेरिकेचे राष्ट्राध्यक्ष जो बायडन आणि पॅलेस्टाइनचे राष्ट्रपती महमूद अब्बास यांच्यात दूरध्वनीवरून चर्चा झाली. बायडन यांनी काही दिवसांपूर्वीच इस्रायलचे पंतप्रधान बेंजामिन नेतन्याहू यांच्यासोबत चर्चा केली होती. पॅलेस्टाइनचे राष्ट्रपती महमूद अब्बास यांनी आम्हालाही शांतता हवी आहे, मात्र, इस्रायलने बळकावलेल्या पॅलेस्टाइनच्या भूभागावरून माघार घेतल्याशिवाय शांतता प्रस्थापित होणार नसल्याचे सांगितले. पॅलेस्टाइनचे राष्ट्रपती महमूद अब्बास यांनी बायडन यांच्यासोबतच्या चर्चेदरम्यान अमेरिकन राष्ट्रपती जो बायडन यांना म्हटले की, पॅलेस्टाइनच्या नागरिकांना शांतता हवी आहे. त्यासाठी आंतरराष्ट्रीय पातळीवर मध्यस्था स्वीकारण्यास तयार आहे. तर, बायडन यांनीदेखील हिंसाचार कमी करण्यास आणि शांतता प्रस्थापित करण्याचे आवाहन केले. वाचा: सध्या इस्रायल-पॅलेस्टाइनमधील संघर्ष चिघळला असून दोन्ही देश माघार घेण्याच्या मनस्थितीत नसल्याचे तज्ज्ञांनी म्हटले. दोन देशांमधील संघर्ष हा आता पूर्ण युद्धाकडे जात असल्याची भीती व्यक्त करण्यात येत आहे. इस्रायलच्या हल्ल्यात शेकडो पॅलेस्टीनी नागरीक ठार झाले आहेत. यामध्ये लहान मुलांचाही समावेश आहे. वाचा: वाचा: दरम्यान, इस्रायल आणि पॅलेस्टाइनमधील भीषण संघर्ष सातव्या दिवशीही सुरू आहे. इस्रायलच्या लढाऊ विमानांद्वारे हवाई हल्ले सुरूच आहे. तर, हमासदेखील सातत्याने रॉकेट हल्ला करत आहे. सोमवारपासून हमासने २३०० रॉकेट डागले असल्याचा दावा इस्रायलने केला आहे. इस्रायलने हमासविरोधात आपली कारवाई तीव्र केली असून आतापर्यंतचा सर्वात भीषण हल्ला केला आहे. या हल्ल्यात हमास प्रमुख याह्या अल सिनवार यांचेही घर उद्धवस्त झाले असल्याचा दावा करण्यात करण्यात आला आहे.
