नवी दिल्ली : सलग तिसऱ्यांदा मुख्यमंत्रीपदाची सूत्रं हातात घेतल्यानंतर पुन्हा एकदा 'अॅक्शन मोड'मध्ये आल्या आहेत. मुख्यमंत्रीपदाची शपथ घेतल्यानंतर काही तासांनीच ममता बॅनर्जी यांनी बुधवारी पोलीस अधिकाऱ्यांच्या बदल्यांचे आदेश दिले आहे. यात ममतांनी २९ वरिष्ठ पोलीस अधिकाऱ्यांच्या बदल्यांचे आदेश दिले आहेत. निवडणुकीपूर्वी आचारसंहिता लागू असताना निवडणूक आयोगानं बदल्या केलेल्या पोलीस अधिकाऱ्यांचाही यात समावेश आहे. (Mamata Banerjee brings back cops EC had transferred) याशिवाय राज्य सरकारनं कूच बिहार जिल्ह्याचे पोलीस अधीक्षक (SP) देबाशिष धर यांना निलंबित करण्याचे आदेश दिले आहेत. इथे सीतलकूची मतदारसंघात १० एप्रिल रोजी झालेल्या मतदानादरम्यान सीआयएसएफच्या कथित गोळीबारात चार जणांचा मृत्यू झाला होता. मुख्यमंत्री ममता बॅनर्जी यांनी या घटनेसंबंधी अगोदरच सीआयडी चौकशीचे आदेश दिले आहेत. बुधवारी सायंकाळी दिलेल्या आदेशानुसार, वरिष्ठ स्तराच्या अधिकाऱ्यांना आपल्या अगोदरच्या पदांवर पुन्हा एकदा नियुक्त करण्यात आलंय. यात पोलीस महासंचालक वीरेंद्र, अतिरिक्त महासंचालक (कायदे-व्यवस्था) जावेद शमीम आणि महासंचालक (सुरक्षा) विवेक सहाय यांचाही समावेश आहे. हे अधिकारी ममतांचे विश्वासू समजले जातात. देबाशिष धर यांच्या जागेवर कन्नन यांना पोलीस अधीक्षक पदावर नियुक्त करण्यात आलंय. कन्नन यांना निवडणूक काळात पोस्टिंगच्या प्रतिक्षेत ठेवण्यात आलं होतं. निवडणूक आयोगाकडून डीजीपी वीरेंद्र यांची बदली करत त्यांच्या जागी नीरज नयन पांडे यांची नियुक्ती करण्यात आली होती. आता मात्र पांडे यांना महासंचालक (अग्निशमन सेवा) म्हणून नियुक्त करण्यात आलंय. अतिरिक्त महासंचालक (कायदा व सुव्यवस्था) जगमोहन यांची बदली करून सिव्हिल डिफेन्सला पाठवण्यात आलंय तर त्यांच्या जागी पुन्हा जावेद शमीम यांच्याकडे या पदाची जबाबदारी सोपवण्यात आलीय. तर, मेदिनीपूरच्या पुबा भागातील एका रॅलीदरम्यान ममता बॅनर्जी जखमी झाल्यानंतर सहाय यांच्यावर सुरक्षा यंत्रणेत कथित चुकीचा ठपका ठेवत निवडणूक आयोगानं त्यांना पोलिस महासंचालक पदावरून हटवलं होतं. यासाठी, एक वेगळा आदेश काढत सहाय यांना त्यांच्या अगोदरच्याच पदावर पुन्हा एकदा तैनात करण्यात आलंय.
