नवी दिल्ली : भारतासाठी आता एक आनंदाची बातमी आली असून महिला कुस्तीपटू विनेश फोगटने सुवर्णपदकाला गवसणी घातली आहे. पोलंड येथे सुरु असलेल्या स्पर्धेत विनेशने ही सुवर्ण कामगिरी करत भारताचा तिरंगा फडकावला आहे. विनेशने पोलंड खुल्या कुस्ती स्पर्धेच्या अंतिम फेरीत युक्रेनच्या ख्रिस्तियाना बेरेझाला ८-० अशी धुळ चारली. विनेशने यावेळी बेरेझाला एकही गुण पटकावू दिला नाही आणि तिला मोठ्या फरकाने धुळ चारली. त्यामुळे आता आगामी ऑलिम्पिकमध्ये विनेशकडून भारतीय चाहत्यांच्या अपेक्षा उंचावलेल्या आहेत. विनेशचे हे या मोसमातील तिसरे सुवर्णपदक ठरले आहे. या मोसमा विनेशने तिसरे सुवर्णपदक पटकावत ऑलिम्पिकसाठी भारतीयांच्या अपेक्षा उंचावल्या आहेत. यापूर्वी मार्च महिन्यात मॅटेओ पोलिसॉन स्पर्धेत विनेशने सुवर्णपदक पटकावले होते. त्यानंतर एप्रिल महिन्यात झालेल्या आशियाई अजिंक्यपद स्पर्धेत विनेशने सुवर्णपदकाला गवसणी घातली होती. सध्याच्या घडीला भारताच्या कुस्ती विश्वात सुशील कुमारचे प्रकरण चांगलेच गाजत आहे. या प्रकरणामुळे चाहते निराश झाले आहेत. पण विनेशला सुवर्णपदक मिळाल्यामुळे आता त्यांना ऑलिम्पिकमध्ये आशेचा किरण दिसू लागला आहे. त्यामुळे आता विनेश ऑलिम्पिकमध्ये कशी कामगिरी करते आणि भारताला पदक जिंकवून देते का, याकडे सर्व चाहत्यांना नजरा लागलेल्या असतील.
