तेल अवीव: इस्रायलमध्ये अखेर १२ वर्षानंतर सत्तांतर झाले आहे. यांचे सरकार कोसळले असून यामिना पक्षाचे नफ्ताली बेनेट इस्रायलचे नवे पंतप्रधान असणार आहेत. बेंजामिन नेतन्याहू यांना रविवारी संसदेत आपले बहुमत सिद्ध करता आले नाही. नेफ्ताली यांनी पंतप्रधानपदाची शपथ घेतल्यानंतर देशातील विविध विचार, मतप्रवाह असलेल्या लोकांना एकत्र घेऊन सरकार चालवणार असल्याचे म्हटले. रविवारी, नेतन्याहू यांना संसदेत बहुमत सिद्ध करण्यास अपयश आले. संसदेत नेतन्याहू यांच्या विरोधात ६० जणांनी मतदान केले. तर, त्यांच्या समर्थनात ५९ सदस्यांनी मतदान केले. एक सदस्य मतदानावेळी अनुपस्थित होता. काठावरील बहुमताने नफ्ताली बेनेट यांचे सरकार स्थापन झाले आहे. नव्या सरकारमध्ये २७ जणांना मंत्रिमंडळात स्थान मिळाले आहे. यात ९ महिलांचा समावेश आहे. नव्या सरकारमध्ये उजवे, मध्यममार्गी आणि डाव्या विचारांचे प्रतिनिधीत्व करणाऱ्या पक्षांचा समावेश आहे. त्याशिवाय इस्रायलमधील अरब समुदायाचे प्रतिनिधीत्व करणाऱ्या 'राम' या पक्षाचाही समावेश आहे. कोण आहेत नेफ्टाली बेनेट हे इस्रायलच्या डिफेन्स फोर्सच्या एलिट कमांडो युनिटचे सायरेत मटकल आणि मगलनचे कमांडो होते. वर्ष २००६ मध्ये बेंजामिन नेतन्याहू यांच्या नेतृत्वात त्यांनी राजकारणात प्रवेश केला. त्यानंतर ते नेतन्याहू यांचे चीफ ऑफ स्टाफ होते. वर्ष २०१२ मध्ये नेफ्टाली हे 'द जुइश होम' या पक्षाच्यावतीने खासदार म्हणून निवडून आले. त्यानंतर न्यू राइट आणि यामिना पक्षातून खासदार झाले. वर्ष २०१२ ते २०२० दरम्यान नेफ्टाली पाच वेळेस इस्रायलच्या संसदेचे सदस्य होते. त्याशिवाय २०१९ ते २०२० दरम्यान ते इस्रायलचे संरक्षण मंत्रीही होते. वाचा: सरकार स्थिर राहणार? नेतन्याहू यांच्या लिकुड पक्षाची सत्ता जाणार असली तरी नवीन येणारे सरकार कितपत स्थिर असेल याबाबत अनेकांनी शंका उपस्थित केल्या आहेत. आघाडीत असलेला पक्ष 'राम' हा पक्ष इस्रायलमधील अरबांचे प्रतिनिधीत्व करतो. हा पक्ष पॅलेस्टिनी नागरिकांना त्यांचे अधिकार मिळाले पाहिजे आणि इस्रायलने विस्तारवादी भूमिका सोडली पाहिजे अशी भूमिका मांडतो. तर, पंतप्रधान होणारे नेफ्टाली बेनेट हे अतिउजव्या विचारांचे आहेत. या आघाडीतील सर्वात मोठा पक्ष एटिड हा पक्ष मध्यममार्गी भूमिका घेणारा आणि इस्रायल-पॅलेस्टाइन अशा दोन राष्ट्रांचा सिद्धांत मान्य करणारा पक्ष आहे.
