म. टा. प्रतिनिधी, पुणेः ' हे शरद पवार यांचे ऐकत नाहीत, हे माहिती होते. आता कार्यकर्तेच अजित पवारांचे ऐकत नाहीत, हे मी पहिल्यांदाच पाहात आहे,' अशी टीका खासदार यांनी राष्ट्रवादी काँग्रेसच्या नवीन कार्यालयाच्या उद्घाटनाच्या पार्श्वभूमीवर केली. राष्ट्रवादी काँग्रेस हा पश्चिम महाराष्ट्रातील पक्ष असल्याने त्यांना आपण प्रमुख राजकीय पक्ष मानत नसल्याचेही ते खोचकपणे म्हणाले. जागतिक योग दिनानिमित्त पुण्यात आयोजित केलेल्या कार्यक्रमानंतर बापट यांनी माध्यमांशी संवाद साधला. राष्ट्रवादी काँग्रेसच्या नवीन कार्यालयाच्या उद्घाटन समारंभाला झालेल्या गर्दीच्या पार्श्वभूमीवर बापट म्हणाले, 'महापालिकेच्या आगामी निवडणुकांमध्ये पुण्यात भाजपचीच सत्ता येणार आहे. आतापर्यंत आपणास अजित पवार हे शरद पवारांचे ऐकत नसल्याचे माहिती होते. आता कार्यकर्तेही 'दादां'चे ऐकत नाही, हे मी पहिल्यांदा पाहतोय.' शिवसेना नेते आणि आमदार प्रताप सरनाईक यांच्या लेटरबॉम्बविषयी बापट यांनी प्रतिक्रिया व्यक्त केली. 'भाजपची शिवसेनेसोबत नैसर्गिक आणि हिंदुत्वावर आधारित युती आहे. मध्यंतरीच्या काळात ही युती काही लोकांमुळे तुटली. दोन्हीही पक्षांचा हिंदुत्व हा श्वास आहे. सरनाईक यांनी मुख्यमंत्री उद्धव ठाकरे यांना लिहिलेल्या पत्रात त्यांनी सगळ्यांच्याच मनातील भाष्य केले आहे. निर्णय काय घ्यायचा हे शिवसेनेच्या हाती आहे. भविष्यात अशी युती झाल्यास भाजपच्या कार्यकर्त्यांना आनंदच होईल. महापालिकेच्या निवडणुकीत राष्ट्रवादी काँग्रेसपेक्षा शिवसेनेला सोबत घेण्यास आम्ही अधिक प्राधान्य देऊ,' अशी भूमिका बापट यांनी व्यक्त केली आहे.
