म. टा. प्रतिनिधी, पिंपरी: गेले दीड वर्षे सुरू असलेल्या करोनाच्या साथीने प्रत्येक जण आर्थिक अडचणीत आला आहे. त्यामुळे पोटपाणी चालवण्यासाठी तरुणांचे पाय आपोआपच चुकीच्या कामांकडे वळत आहेत. नवा तरुण वर्ग गुन्हेगारी क्षेत्रात अडकत असल्याचे पोलिसांच्या निदर्शनात येत आहे. परिणामी, २०१९ च्या तुलनेत मागील दीड वर्षांत गुन्हेगारीचे प्रमाण वाढले आहे. पिंपरी-चिंचवड पोलिस आयुक्तालयांतर्गत एमआयडीसीचा मोठा परिसर असल्याने राज्य, परराज्यातील अनेक जण नोकरीनिमित्त या परिसरात स्थिरावले आहेत. त्यात गेल्या वर्षी मार्चच्या दुसऱ्या आठवड्यात शहरात करोनाचा रुग्ण आढळून आला. तेव्हापासून सातत्याने रुग्णसंख्येत वाढ झाल्याने कठोर निर्बंधांसह लॉकडाउन करण्यात आले. परिणामी येथील सर्व कंपन्या पूर्ण बंद होत्या. इतर उद्योग-व्यवसाय सुरू ठेवण्यास मनाई होती. त्यामुळे अनेकांच्या हातचा रोजगार गेला. बेरोजगारीने व्यसनाधीनता वाढून संसारात विघ्न आले. अनेक युवकांचे पालक करोनामुळे मृत्युमुखी पडले. परिणामी पोटापाण्यासाठी काहीही करण्याची त्यांची तयारी दिसून येते. यात त्यांच्याकडून गुन्हेगारी कृत्य होऊन त्यांचा गुन्हेगारी क्षेत्रात प्रवेश झाल्याचे सांगण्यात येते. गुन्हेगारीत नवे चेहरे? नोकरी नाही, व्यवसाय बंद, हाताला काम नसल्याने, तसेच करोनामुळे जवळचे नातलग दुरावले. अशा अवस्थेत व्यसनाधीनतेकडे वळलेले तरुण जुन्या गुन्हेगारांच्या सान्निध्यात आले. त्यातून ते गुन्हेगारी क्षेत्रात आपोआपच ओढले गेल्याचे समोर आले आहे. या नव्या तरुण चेहऱ्यांच्या गुन्हेगारांची संख्या गेल्या दीड वर्षांत प्रचंड वाढली आहे. करोनामुळे बेरोजगारीचे प्रमाण वाढून कर्जबाजारीपणा वाढला. त्यातील अनेक जण व्यसनांच्या आहारी गेले आहेत. त्यांच्याकडून गुन्हेगारी कृत्य होत आहेत. त्यातून त्यांचा जुन्या गुन्हेगारांशी संपर्क होतो आणि ते गुन्हेगारी क्षेत्रात ओढले जातात. हे नवीन गुन्हेगार शोधण्यासाठी आम्ही प्रयत्न करीत आहोत. - सुधीर हिरेमठ, पोलिस उपायुक्त, पिंपरी-चिंचवड कमी वयात एकलकोंडेपणा, व्यसनाधीनता वाढली आहे. मोबाइलचा गैरवापर वाढल्याने चांगल्या गोष्टी शिकण्याऐवजी तरुण मुलांत गुन्हेगारी वृत्ती वाढीस लागत आहे. रिकामा वेळ असल्याने मुले दिशाहीन होत आहेत. त्यामुळे पालकांनी मुलांवर लक्ष दिले पाहिजे. - डॉ. मनजित संत्रे, मानसोपचारतज्ज्ञ, पिंपरी-चिंचवड शहरातील गुन्हेगारीचा आलेख - गुन्हेगारी : २०१९ - २०२० - २०२१ मे महिनाअखेर चोऱ्या : २२०४-१४३०-७६६ दरोडे : २० - २४ - २० खून : ६८ - ७१ - २६ जीवे मारण्याचा प्रयत्न : ९१ - ६७- ५३
