मुंबई : अर्थव्यवस्था सावरू लागल्याने इंधन मागणी वाढली आहे. तुलनेने पुरवठा मर्यादित असल्याने कच्च्या तेलाच्या किंमतीत वाढ होत आहे. जागतिक कमॉडिटी बाजारात कच्च्या तेलाचा भाव ७४.१८ डॉलरपर्यंत वाढला आहे. मात्र पेट्रोलियम कंपन्यांनी आज सोमवारी इंधन दरात कोणताही बदल केला नाही. काल रविवारी देखील इंधन दर स्थिर होते. आज सलग नवव्या दिवशी पेट्रोल आणि 'जैसे थे'च आहे. मुंबईत आजचा एक लीटर पेट्रोलचा भाव १०७.८३ रुपये आहे. दिल्लीत पेट्रोल १०१.८४ रुपये आहे. चेन्नईत पेट्रोलचा भाव १०२.४९ रुपये इतका आहे. तर कोलकात्यात एक लीटर पेट्रोल १०२.०८ रुपये झाले आहे. भोपाळमध्ये साध्या पेट्रोलचा भाव ११०.२० रुपयांवर कायम आहे. बंगळुरात पेट्रोल १०५.२५ रुपये झाले आहे. मुंबईत आजचा डिझेलचा भाव ९७.४५ रुपयांवर कायम आहे. दिल्लीत डिझेल ८९.८७ रुपये आहे. चेन्नईत ९३.६३ रुपये आणि कोलकात्यात डिझेलचा भाव ९३.०२ रुपये प्रती लीटर झाला आहे. भोपाळमध्ये डिझेलचा भाव ९८.६७ रुपये झाला आहे. बंगळुरात डिझेल ९५.२६ रुपये आहे. दरम्यान, पाच राज्यांच्या विधानसभा निवडणुकांनंतर देशभरात पेट्रोल आणि डिझेल दरवाढीचा भडका उडाला होता. कंपन्यांनी ४२ वेळा दरवाढ केली. यात पेट्रोल ११.५२ रुपयांनी वधारले. तर जवळपास १० रुपयांनी डिझेल महागले होते. तीन महिन्यांनंतर कंपन्यांनी डिझेल दरात किंचित कपात केली होती. चालू आठवड्यात कच्च्या तेलाच्या किमतीत तेजी राहण्याची शक्यता विश्लेषकांनी व्यक्त केली आहे. आठवड्याच्या पहिल्याच दिवशी कच्च्या तेलाचा भाव वाढला आहे. सिंगापूर बाजारात ब्रेंट क्रूडचा भाव ०.८ डॉलरने वधारला आणि तो ७४.१ डॉलर झाला. डब्ल्यूटीआय क्रूडचा भाव ०.८ डॉलरने वधारून ७२.१५ डॉलर प्रती बॅरल झाला आहे.
