म. टा. विशेष प्रतिनिधी : राज्य सरकारने करोनाविषयक निर्बंधांमध्ये कोणतीही शिथिलता आणली नसतानाही, त्याकडे सर्रास दुर्लक्ष केले जात आहे. मालाड पश्चिम येथील लिंक रस्त्यावरील डी-मार्टमध्ये शनिवारी करोना नियमांचा भंग करत ग्राहकांची प्रचंड गर्दी जमली होती. तिथे सुरक्षित अंतराचे नियमदेखील पाळले जात नव्हते. तसेच तेथील कर्मचाऱ्यांकडून मास्क, हातमोजांचाही वापर केला जात नसल्याचे पालिकेच्या कारवाईत आढळून आले. त्यामुळे पालिकेच्या पी/उत्तर प्रभागाला हे सील करण्याचे आदेश देण्यात आले आहेत. करोना रोखण्यासाठी लसीकरणाप्रमाणेच मास्कचा वापर, सुरक्षित अंतर, गर्दी न करणे आदी अनेक नियम महत्त्वाचे आहेत. मात्र, ही खबरदारी न घेता मालाड पश्चिमेतील डी-मार्टमध्ये गर्दी झाली होती. तिथे, कर्मचाऱ्यांसह ग्राहकांनीही सुरक्षित अंतराचे नियम पाळले नव्हते. बिल काउंटरवरील कर्मचाऱ्यांनी तिथे पैसे, डेबिट/क्रेडिट कार्ड, बिलांची हाताळणी करताना हातमोजे, मास्क वापरले नव्हते. पालिकेच्या पी/उत्तर विभागातील अधिकारी, कर्मचाऱ्यांच्या पथकाने डी-मार्टला सील ठोकले आहे. तसेच, व्यवस्थापकास नोटीस बजावून तीन दिवसांत स्पष्टीकरण सादर करण्याचे आदेश दिले आहेत. तसेच, डी मार्टच्या व्यवस्थापकास नियमभंगाची नोटीस बजावताना त्यात परवाना रद्द करण्याबाबत तीन दिवसांत स्पष्टीकरण सादर देण्याचे आदेश पी/उत्तर विभागाचे सहाय्यक आयुक्त मकरंद दगडखैरे यांनी दिले आहेत.
