काबूल: अफगाणिस्तानमध्ये वरचढ होत असून अफगाण सैन्याची पिछेहाट होत आहे. तालिबानने महत्त्वाच्या ठिकाणांचा ताबा घेतल्याने चिंता व्यक्त केली जात आहे. तर, दुसरीकडे तालिबानने अफगाण हवाई दलाचे हेलिकॉप्टर ताब्यात घेतले आहे. रशियन बनावटीचे हे हेलिकॉप्टर भारताने अफगाणिस्तानला भेट म्हणून दिले होते. याचा व्हिडिओही व्हायरल झाला आहे. तालिबानने कुंदूज विमानतळाचा ताबा घेतला आहे. तालिबानने ताब्यात घेतलेले हेलिकॉप्टर हे नादुरुस्त असल्याची माहिती समोर आली. अफगाण हवाई दलाच्या जवानांनी तळावरून हेलिकॉप्टर सोडून जाताना त्यातील महत्त्वाची उपकरणे काढली आहेत. त्यामुळे हे हेलिकॉप्टर उड्डाण घेऊ शकत नाही. भारताने अफगाणिस्तानला दिली होती ६ हेलिकॉप्टर भारताने अफगाणिस्तानला पहिल्यांदा २०१५-१६ मध्ये एमआय-२४ हे लढाऊ हेलिकॉप्टर भेट दिले होते. त्यानंतर २०१९ मध्ये आणखी दोन एमआय-२४ हेलिकॉप्टर भेट दिले. हेलिकॉप्टर भेट देण्याच्या कार्यक्रमात भारताचे तत्कालीन राजदूत विनय कुमार आणि अफगाणिस्तानचे त्यावेळचे संरक्षण मंत्री असदुल्ला खालिददेखील सहभागी झाले होते. मैत्री भेट म्हणून दिले होते हेलिकॉप्टर अफगाणिस्तानला भेट देण्यात आलेले एमआय-२४ हेलिकॉप्टर हे भारतीय हवाई दल वापरत होते. आवश्यकतेच्या आधारावर भारताने नवीन लढाऊ हेलिकॉप्टर खरेदी केले आणि एमआय-२४ला ओव्हरहॉल करून अफगाणिस्तानला सोपवले. भारताने त्यावेळी अफगाणिस्तानमध्ये या हेलिकॉप्टरचे पायलट आणि देखभाल कर्मचाऱ्यांनाही प्रशिक्षण दिले होते. या लढाऊ हेलिकॉप्टरमध्ये आठ जणांच्या बसण्याची व्यवस्था आहे. काही देशांमधील युद्धात या हेलिकॉप्टरने सहभाग घेतला आहे. या हेलिकॉप्टरमध्ये २३ एमएमची डबल बॅरल GSh-23V कॅनन आहे. एका मिनिटात ३४०० ते ३६०० राउंड फायरिंग करता येणे शक्य आहे. त्याशिवाय या हेलिकॉप्टरमध्ये अॅण्टी टँक मिसाइल, रॉकेट, गन आणि अतिरिक्त इंधन टाकी लावता येऊ शकते.
