सध्याच्या घडीला प्रतिबंधित क्षेत्रे केवळ इमारतींमध्ये - चाळी-झोपड्यांमधील संख्या शून्य - तिसऱ्या लाटेच्या पार्श्वभूमीवर दक्षता घेण्याची गरज म. टा. विशेष प्रतिनिधी, मुंबई मुंबईत सध्याच्या घडीला करोनाचा जोर ओसरला असला, तरी काही ठिकाणी रुग्णसंख्येत वाढ दिसत आहे. करोनाच्या तिसऱ्या लाटेच्या पार्श्वभूमीवर, पालिकेने सज्जता ठेवली आहे. करोनाचा संसर्ग पसरू नये म्हणून पालिकेने उंच इमारती तसेच काही रहिवासी संकुले ही प्रतिबंधित क्षेत्रामध्ये आणली आहेत. मात्र उपलब्ध माहितीनुसार, चाळी तसेच झोपडपट्ट्यांमध्ये प्रतिबंधित क्षेत्रांची संख्या शून्य असल्याचे दिसते. मुंबईमध्ये एक हजार ५२८ मजले सील करण्यात आले आहेत. उपचाराधीन रुग्णसंख्येमध्ये वाढ होत असलेल्या प्रभागांपैकी काही प्रभागांमध्ये झोपडपट्ट्या तसेच बैठ्या चाळींची संख्या मोठी आहे. मात्र निकषांपेक्षा अधिक रुग्णसंख्या असलेल्या वस्त्यांमध्येही कोणताही भाग पालिकेने सील केलेला दिसत नाही. मुंबईमध्ये दाटीवाटीच्या लोकवस्तीमध्ये राहणाऱ्या नागरिकांमध्ये समूह प्रतिकारशक्ती निर्माण झाल्याने इथे संसर्गाचा फैलाव कमी होण्याची शक्यता सिरो सर्वेक्षणामध्ये व्यक्त करण्यात आली होती. मात्र केवळ हे सर्वेक्षण प्रमाण मानून बैठ्या चाळी तसेच झोपडपट्ट्यांमध्ये संसर्गाची शक्यता नसल्याचे गृहीत धरणे योग्य होणार नाही, याकडे करोनासह संसर्गजन्य आजाराचे तज्ज्ञ डॉ. आर. एस. नायर यांनी लक्ष वेधले आहे. पालिकेतील वरिष्ठ प्रशासकीय अधिकाऱ्यांनी बैठ्या चाळी तसेच झोपडपट्ट्यांमध्ये प्रतिबंधित क्षेत्रे लावण्यामध्ये येत असलेल्या अडचणींकडे लक्ष वेधले. इमारतींमध्ये प्रतिबंधित क्षेत्रांचे निकष तातडीने लावले जातात, कारण लोक एका मर्यादित स्वरूपातील बांधकामाच्या रचनेमध्ये राहत असतात. मात्र जिथे लोकसंख्या विखुरलेली असते, तिथे या क्षेत्रांमध्ये निर्बंध कसे लावावेत, हा प्रश्न असतो. त्याची अंमलबजावणीही तुलनेने अवघड होते, असे अधिकाऱ्यांचे मत आहे. रुग्णसंख्या कमी करोना संसर्गाच्या पहिल्या लाटेमध्ये दाटीवाटीच्या परिसरामधून येणाऱ्या रुग्णांची संख्या अधिक होती. त्यामुळे या वस्त्यामध्ये प्रवेश घेण्याच्या जागा बंद करण्यात आल्या होत्या. आता या भागात करोना रुग्णसंख्या ही मोठ्या इमारतींच्या तुलनेमध्ये कमी आहे. त्यामुळे येथे प्रतिबंधित क्षेत्र लागू करण्याची गरज नसल्याचे एफ दक्षिण विभागातील अधिकाऱ्यांनी सांगितले. सील केलेल्या मजल्यांची संख्या मुंबईमध्ये एक हजार ५२८ मजले सील करण्यात आले आहेत. के पश्चिम १९० आर दक्षिण १८२ एम पश्चिम १६३ के पूर्व १२८ पी उत्तर १२८ डी ९९ पी दक्षिण ६४ जी उत्तर ६२
