म. टा. विशेष प्रतिनिधी, : मनी लाँड्रिंग प्रकरणात अंमलबजावणी संचालनालयाने (ईडी) वारंवार बजावलेल्या समन्सविरोधात यांनी केलेल्या अर्जावर आता २९ सप्टेंबर रोजी 'व्हिडिओ कॉन्फरन्सिंग'द्वारे सुनावणी होणार आहे. याविषयी ईडीतर्फे नवी दिल्लीतून केंद्र सरकारचे सॉलिसिटर जनरल तुषार मेहता हे युक्तिवाद मांडणार असल्याचे सांगून सुनावणी पुढे ढकलण्याची विनंती ईडीने केली. त्यामुळे मुंबई उच्च न्यायालयाने सुनावणी तहकूब करतानाच दरम्यानच्या काळात 'ईडी'ला आवश्यकता वाटल्यास प्रतिज्ञापत्रावर आपले उत्तर दाखल करता येईल, असेही न्या. संभाजी शिंदे व न्या. निजामुद्दीन जमादार यांच्या खंडपीठाने स्पष्ट केले. भ्रष्टाचाराच्या आरोपांविषयी सीबीआयने एफआयआर नोंदवल्यानंतर ईडीनेही देशमुख यांच्याविरोधात गुन्हा नोंदवून तपास सुरू केला. ईडीने वारंवार समन्स बजावल्यानंतर देशमुख यांच्याविरोधात लुकआऊट नोटीसही काढली. याविरोधात देशमुख यांनी अॅड. अनिकेत निकम यांच्यामार्फत अर्ज केला आहे. या अर्जावर एकल न्यायाधीश पीठासमोर की खंडपीठासमोर सुनावणी होणार, असा प्रश्न सुरुवातीला निर्माण झाल्यानंतर कायद्यानुसार सुनावणी खंडपीठासमोर होईल, असे न्या. संदीप शिंदे यांनी आपल्या निर्णयात स्पष्ट केले. त्यानुसार, गुरुवारी हा विषय खंडपीठासमोर आला. त्या वेळी 'या अर्जावर व्हीसीद्वारे सुनावणी घ्यावी. कारण, नवी दिल्लीतून सॉलिसिटर जनरल तुषार मेहता हे ईडीतर्फे युक्तिवाद मांडणार आहेत,' अशी विनंती अतिरिक्त सॉलिसिटर जनरल अनिल सिंग यांनी केली. तर, 'ईडीतर्फे जाणीवपूर्वक चालढकल केली जात आहे,' असा आरोप करून न्यायालयाने आजच अर्जावर सुनावणी घेऊन अंतरिम दिलाशाचा आदेश द्यावा, अशी विनंती देशमुख यांचे वकील अॅड. विक्रम चौधरी यांनी केली. अखेरीस दोन्ही बाजू ऐकल्यानंतर खंडपीठाने २९ सप्टेंबरला सुनावणी घेण्याचे निश्चित केले.
