आबुधाबी : सनराझर्स हैदराबादचा संघ आयपीएलमधून बाहेर पडला असला तरी आज त्यांनी राजस्थान रॉयल्सवर सात विकेट्सने विजय साकारला आणि त्यांचे गणित बिघडवल्याचे पाहायला मिळाले. राजस्थानने संजू सॅमसनच्या ८२ धावांच्या जोरावर हैदराबादपुढे १६५ धावांचे आव्हान ठेवले होते. पण हैदराबादने जेसन रॉय आणि कर्णधार केन विल्यम्सनच्या अर्धशतकांचया जोरावर राजस्थानवर सात विकेट्सने मात केली आहे. राजस्थान रॉयल्सला आजच्या सामन्यात गुणतालिकेत वरचे स्थान पटकावण्याची चांगली संधी होती. कारण या सामन्यापूर्वी राजस्थानचे ८ गुण होते, त्यामुळे त्यांनी जर हा सामना जिंकला असता तर त्यांचे १० गुण झाले असते. त्यामुळए राजस्थानच्या संघाला १० गुणांसह चौथे स्थान गाठता आले असते आणि प्ले-ऑफच्या दृष्टीने एक ठोस पाऊल पुढे टाकता आले असते. पण आजच्या पराभवाने मात्र राजस्थानचे आठच गुण राहिले आहेत आणि ते सहाव्या स्थानावर आहेत. दुसरीकडे हैदराबादने विजय साकारला आहे. पण या विजयानंतरही त्यांचे चारच गुण झाले आहेत. या सामन्यापूर्वीच त्यांच्या बाद फेरीत पोहोचण्याच्या आशा मावळल्या होत्या. त्यामुळे या विजयानंतर गुणतालिकेत त्यांच्या स्थानात मोठा बदल होणार नाही. पण या सामन्यात हैदराबादच्या संघाला धडाकेबाज सलामीवीर जेसन रॉयच्या रुपात मिळाला आहे. कारण आजच्या सामन्यात जेसनने हैदराबादला दमदार सुरुवात करून दिली. जेसनने ४२ चेंडूंत आठ चौकार आणि एका षटाकाराच्या जोरावर ६० धावांची खेळी साकारली. जेसन बाद झाल्यावर हैदराबादचा कर्णधार केन विल्यम्सन खेळपट्टीवर उभा राहीला आणि नाबाद अर्धशतक झळकावत त्याने संघाला सात विकेट्स राखून विजय मिळवून दिला. केनने यावेळी ४१ चेंडूंच पाच चौकार आणि एका षटकाराच्या जोरावर नाबाद ५१ धावांची खेळी साकारली. तत्पूर्वी, राजस्थानला दुसऱ्याच षटकात इव्हिन लुईच्या रुपात पहिला धक्का, बसला, लुईसला यावेळी सहा धावा करता आल्या. लुईल बाद झाल्यावर संजू मैदानात आला आणि त्याने सर्व चित्रच बदलून दिले. संजूने यावेळी सुरुवातीला यशस्वी जैस्वालबरोबर जोरदार फटकेबाजी केली. या दोघांनी दुसऱ्या विकेटसाठी ५६ धावांची भागीदारी रचली. यावेळी यशस्वी ३६ धावांवर आऊट झाला आणि ही जोडी फुटली. यशस्वी जबाद झाल्यावर संजू आणखीनच आक्रमक झाल्याचे पाहायला मिळाले. एकाबाजूने विकेट्स पडत असल्या तरी संजू डगमगला नाही. संजूने हैदराबादच्या गोलंदाजीवर आपला प्रहार सुरुच ठेवला होता. संजूने यावेळी अर्धशतकाबरोबरच आयपीएलमधील आपले ३ हजार धावाही पूर्ण केल्याचे पाहायला मिळाले.
