आबुधाबी : मुंबई इंडियन्सच्या संघाला आज सलग दुसरा धक्का बसला. रोहित शर्मा आणि क्विंटन डीकॉक यांच्या भन्नाट सलामीच्या जोरावर मुंबईने केकेआरपुढे १५६ धावांचे आव्हान ठेवले होते. या आव्हानाचा पाठलाग करताना केकेआरच्या वेंकटेश अय्यर आणि राहुल त्रिपाठी यांनी अर्धशतकं झळकावत संघाला सहज विजय मिळवून दिला. वेंकटेशचे हे दुसऱ्या सामन्यातील दुसरे अर्धशतक ठरले आहे. वेंकटेशने या सामन्यात ३० चेंडूंत चार चौकार आणि तीन षटकारांच्या जोरावर ५३ धावांची अफलातून खेळी साकारली. मुंबईच्या आव्हानाचा पाठलाग करताना केकेआरला वेंकटेशने दणकेबाज सुरुवात करून दिली. वेंकटेशने मुंबईच्या गोलंदाजीवर चौफेर हल्ला चढवला आणि केकेआरला विजय मिळवून देण्याता सिंहाचा वाटा उचलला. केकेआराल शुभमन गिलच्या रुपात पहिला धक्का बसला होता. पण त्याची धग वेंकटेशने संघाला जाणवून दिली नाही. वेंकटेशला यावेळी राहुल त्रिपाठीची चांगली साथ मिळाली. या दोघांनी केकेआरसाठी दुसऱ्या विकेटसाठी ८८ धावांची भागदारी रचून दिली. मुंबईचा जसप्रीत बुमराने यावेळी वेंकटेशला बाद केले आणि केकेआरला दुसरा धक्का दिला. पण तोपर्यंत वेंकटेशने आपले काम चोख बजावले होते. तत्पूर्वी, रोहित आणि डीकॉक यांनी यावेळी ९.२ षटकांत ७८ धावांची सलामी दिली. रोहित यावेळी चांगल्या फॉर्मात दिसत होता. पण रोहितला यावेळी ३३ धावांवर असताना सुनील नरिनने बाद केले आणि मुंबई इंडियन्सला मोठा धक्का दिला. रोहित बाद झाल्यावर सूर्यकुमार यादवही जास्त काळ खेळपट्टीवर तग धरू शकला नाही. सूर्यकुमारला यावेळी पाच धावा करता आल्या. एकिकडे विकेट्स पडत असताना डीकॉक मात्र दमदार फलंदाजी करत होता, या सामन्यात त्याने आपले अर्धशतकही पूर्ण केले. डीकॉकला यावेळी प्रसिध कृष्णाने बाद केले. डीकॉकने यावेळी चार चौकार आणि तीन षटकारांच्या जोरावर ५५ धावांची खेळी साकारली. डीकॉकनंतर कायरन पोलार्डने (१४ चेंडूंत २१ धावा) अखेरच्या षटकांमध्ये चांगली फलंदाजी केली आणि मुंबईच्या संघाला दिडशए धावा उभारण्यात मदत केली.
