मुंबई : ठाकरे सरकार स्थापन झाल्यापासून अनेकदा भाजपच्या नेत्यांकडून हे सरकार लवकरच कोसळणार असल्याचा दावा करण्यात आला आहे. या पार्श्वभूमीवर पक्षप्रमुख आणि मुख्यमंत्री यांनी दसरा मेळाव्यात बोलताना भाजपला थेट आव्हान दिलं आहे. 'पुढच्या महिन्यात आपल्या हक्काच्या सरकारला दोन वर्षे पूर्ण होतील. फोडण्याचे अनेक प्रयत्न केले, पाडण्याचे प्रयत्न केले, मी तर आज पण सांगतो हिंमत असेल तर सरकार पाडून दाखवा,' असं उद्धव ठाकरे यांनी म्हटलं आहे. दसरा मेळाव्यात बोलताना उद्धव ठाकरे यांनी भाजपवर टोकदार शब्दांत टीका केली. 'तुमच्या पक्षाच्या पालख्या वाहण्यासाठी या शिवसैनिकाचा जन्म झालेला नाही. देव, देश आणि धर्मासाठी या शिवसैनिकाचा जन्म झालेला आहे. हर हर महादेव म्हणजे काय असतं हे दिल्लीच्या तख्ताला दाखवण्याची वेळ येऊ नये, पण आलीच तर दाखवावचं लागेल,' असा इशाराही उद्धव ठाकरे यांनी दिला आहे. मुख्यमंत्रिपदाबद्दल काय म्हणाले उद्धव ठाकरे? नेते आणि विधानसभेचे विरोधी पक्षनेते देवेंद्र फडणवीस यांचं मुख्यमंत्रिपदाबाबतचं एक वक्तव्य सध्या चर्चेत असतानाच उद्धव ठाकरे यांनीही या पदाबद्दल भाष्य केलं आहे. 'माझ्या जनतेला मी मुख्यमंत्री आहे, असं कधीही वाटतं कामा नये. मी तुमच्या घरातला माणूस आहे, तुमचा भाऊ आहे, असं वाटो ही माझी ईश्वर चरणी प्रार्थना आहे. नेहमी नम्रपणे जनतेचे आशीर्वाद मिळवण्याचा माझा प्रयत्न असतो आणि हे आशीर्वादच खरे वैभव आहे, खरी ताकद आहे. हे जोर जबरदस्तीने मिळत नसतात, ते कमवावे लागतात. ती कमावण्याची परंपरा मिळालेली आहे आपल्याला,' असं ते म्हणाले. हिंदुत्वाच्या मुद्द्यावरून भाजपवर घणाघात 'समाजसेवा, हिंदुत्व रक्तात असावं लागतं. रक्तपिपासूपणा नव्हे तर रक्तदान करणं हासुद्धा धर्म आहे. ज्यांचे जीव वाचवू शकतोय त्यांना आम्ही रक्त देतोय. आता हिंदुत्वाला धोका आहे तो या नवहिंदुंपासून. जेव्हा खरंच हिंदुत्वाला धोका होता तेव्हा एकच मर्द, एकमेव हिंदुहृदयसम्राट बाळासाहेब ठाकरे हिंदुत्वाच्या दुश्मनांसमोर उभे राहिले होते. आव्हान द्यायचं आणि पोलिसांच्या मागे लपायचं हे नामर्दाचं लक्षण आहे, मर्दाचं नाही आणि हिंदुत्वाचं तर मुळीच नाही,' अशा शब्दांत उद्धव ठाकरे यांनी अप्रत्यक्षपणे भाजपवर निशाणा साधला.
