दुबई : अनुभवी दिनेश कार्तिकच्या एका चुकीचा फटका आता कोलकाता नाइट रायडर्सला बसला आहे. कारण दिनेशच्या एका चुकीमुळे केकेआरला फायनल गमवावी लागल्याचे पाहायला मिळाले आहे. नेमकं घडलं तरी काय, पाहा...चेन्नईच्या संघाने फायनलमध्ये १९२ धावा केल्या, यामध्ये सिंहाचा वाटा होता तो फॅफ ड्यु प्लेसिसचा. कारण फॅफने केकेआरच्या गोलंदाजांचा समाचार घेत यावेळी ५९ चेंडूंत सात चौकार आणि तीन षटाकारांच्या जोरावर ८६ धावा केल्या. पण फॅफला फक्त दोन धावांवर बाद करण्याची सुवर्णसंधी केकेआरकडे चालून आली होती. ही गोष्ट घडली ती तिसऱ्या षटकामध्ये. शकिब अल हसन हे तिसरे षटक टाकत होता. या षटकाच्या पहिल्याच चेंडूवर फटका मारण्याच्या नादात फॅफ होता, पण त्याला यावेळी चेंडूचा अंदाज आला नाही, त्यावेळी दिनेश कार्तिककडे फॅफला यष्टीचीत करण्याची संधी आली होती. पण या संधीचे सोने मात्र दिनेशला करता आले नाही. या जीवदानाचा चांगलाच फायदा त्यानंतर फॅफने उचलल्याचे पाहायला मिळाले. कारण त्यानंतर फॅफ ज्यापद्धतीने खेळला ते पाहून सर्वांनाच धक्का बसला. कारण आतापर्यंत फॅफने अशी आक्रमक खेळी साकारली नव्हती. पण जीवदान मिळाल्यावर मात्र फॅफचा आत्मविश्वास चांगलाच वाढलेला पाहायला मिळाला. या जीवदानानंतर फॅफने केकेआरच्या गोलंदाजीवर जोरदार प्रहार केला आणि चेन्नईला १९२ धावा उभारण्यात सिंहाचा वाटा उचलला. दिनेशची ही एक चुक केकेआरला चांगलीच महागात पडली. कारण जर फॅफ त्यावेळी दोन धावांवर आऊट झाला असता तर चेन्नईला एवढी मोठी धावसंख्या उभारता आली नसती. त्यामुळे दिनेशच्या या चुकीचा मोठा फटका केकेआरच्या संघाला बसला आणि या एका चुकीमुळेच त्यांच्यावर फायनल गमावण्याची वेळ आली. क्रिकेटसारख्या खेळात एक चुक किती महागात पडू शकते, याचा प्रत्यय पुन्हा एकदा आला आहे. अंतिम फेरीत सर्वच खेळाडूंवर जास्त दडपण असते, पण हे दडपण झुगारून जो चांगला खेळ करतो तोच चॅम्पियन ठकतो आणि तेच आजच्या सामन्यातही पाहायला मिळाले.
