म. टा. विशेष प्रतिनिधी,मुंबई करोना रुग्णांची संख्या नियंत्रित ठेवण्यासाठी पालिकेची यंत्रणा सर्व पातळ्यांवर प्रयत्न करत असली, तरीही के पश्चिम, आर सेंट्रल, के पूर्व, आर मध्य, पी दक्षिण, एफ दक्षिण तसेच आर आणि एस प्रभागामध्ये करोनाच्या उपचाराधीन रुग्णसंख्येमध्ये वाढ होताना दिसते. या प्रभागामध्ये अंधेरी, कांदिवली, बोरिवली, मालाड, माटुंगा, ग्रँट रोड यांचा समावेश आहे. सध्या मुंबईमध्ये पाच हजार उपचाराधीन करोना रुग्णांची नोंद आहे. मुंबईत बऱ्या झालेल्या रुग्णांचा दर हा ९७ टक्के असून ३ ते ९ ऑक्टोबर या कालावधीमध्ये मुंबईमध्ये करोना रुग्णवाढीचा दर ०.०७ टक्के इतका नोंदवण्यात आला. शहराचा रुग्णदुपटीचा कालावधी हा एक हजार ५७ दिवसांचा आहे. हा कालावधी ८६५ पेक्षा कमी असलेल्या प्रभागांमध्ये डी, ई, एफ दक्षिण तसेच एच पश्चिम या प्रभागांचा समावेश होतो. डी म्हणजे ग्रँट रोड प्रभागामध्ये रुग्णदुपटीचा कालावधी हा ८६४ दिवसांचा असून भायखळा येथे हा कालावधी ७७८ दिवस आहे. एफ दक्षिण म्हणजे माटुंगा येथे ७७८, वांद्रे येथे ७७५ दिवसांची नोंद करण्यात आली आहे. स्थानिक डॉक्टरांना सूचना पालिकेने स्थानिक डॉक्टरांना यासंदर्भात दक्षतेच्या सूचना दिल्या आहेत. ताप, सर्दी, खोकला तसेच इतर आजारांसंदर्भात कोणत्याही तक्रारी घेऊन येणाऱ्या रुग्णांची तातडीने नोंद करावी, तसेच करोनाच्या चाचण्या करून घेण्याचा सल्ला द्यावा, असेही निर्देश देण्यात आले आहेत. उपचाराधीन रुग्णसंख्या के पश्चिम-अंधेरी ४६७ आर मध्य- बोरिवली ३३३ के पूर्व ३०८ आर मध्य ३०९ पी उत्तर २३१ एफ उत्तर २९३ डी-ग्रँट रोड २९०
