मुंबई : छोट्या पडद्यावर विविध मालिकांमधून आपल्या अभिनयाने स्वतःचे वेगळे स्थान निर्माण करणा-या अभिनेत्री या रस्ते अपघातामध्ये गंभीर जखमी झाल्या होत्या. अपघातानंतर वर्षा अंथरुणावरच आहेत. इन्स्टाग्रामवर पोस्ट करून त्यांनी आपल्या आजारपणाची माहिती चाहत्यांना दिली होती. वर्षा यांनी केलेल्या पोस्टची दखल मुख्यमंत्री यांनी घेतली. मुंबई महानगर पालिकेच्या महापौर किशोरी पेडणेकर यांनी मुख्यमंत्र्यांच्या निर्देशांनुसार वर्षा दांदळे यांची नाशिकला जाऊन सदिच्छा भेट घेतली तसेच सर्वतोपरी मदत करण्याचेही आश्वासन दिले आहे. महापौर पेडणेकर यांच्या भेटीचे फोटो वर्षा दांदळे यांनी इन्स्टाग्रामवर पोस्ट केले आहेत. छोट्या पडद्यावरील अनेक मालिकांमध्ये काम करून आपल्या अभिनयाने स्वतःचा चाहता वर्ग वर्षा दांदळे यांनी निर्माण केला आहे. अभिनेत्री असलेल्या वर्षा या मुंबई महापालिकेमध्ये शिक्षिका म्हणून कार्यरत होत्या. भंडारदरा येथून मुंबईला परत येत असताना अभिनेत्री वर्षा दांदळे यांच्या गाडीला अपघात झाला. हा अपघात झाल्यापासून अंथरुणावरच आहेत. आपल्यावर डॉक्टर उपचार करत असल्याची माहिती वर्षा यांनी सोशल मीडियावर पोस्ट करत आपल्या चाहत्यांना दिली. तसेच आपल्यासाठी प्रार्थना करण्याचे भावनिक आवाहनही केले होते. त्यांच्या या पोस्टची दखल राज्याचे मुख्यमंत्री उद्धव ठाकरे यांनी घेतली. इतकेच नाही तर वर्षा दांदळे यांच्या तब्येतीची चौकशी करण्याचे निर्देश मुंबई महापालिकेच्या महापौर किशोरी पेडणेकर यांना दिले. त्यानुसार महापौर पेडणेकर यांनी नाशिकला जाऊन अभिनेत्री आणि मुंबई महापालिकेत शिक्षिका म्हणून काम केलेल्या वर्षा दांदळे यांची सदिच्छा भेट घेत त्यांची विचारपूस केली. महापौर पेडणेकर यांच्या भेटीचा फोटो वर्षा यांनी इन्स्टाग्राम अकाऊंटवर शेअर केला आहे. हा फोटो शेअर करत, वर्षा यांनी लिहिले आहे की, ‘बृहन्मुंबई महानगरपालिका शिक्षिका व अभिनेत्री वर्षा दांदळे यांच्या अपघाताची बातमी महाराष्ट्राचे राज्याचे मुख्यमंत्री उद्धव बाळासाहेब ठाकरे यांना समजली. त्यानंतर त्यांनी वर्षा दांदळे यांच्या प्रकृतीची चौकशी करण्यासाठी यांना नाशिक येथे जाऊन त्यांची भेट घेण्याचे निर्देश दिले. त्यानुसार मुंबईच्या महापौर किशोरी पेडणेकर यांनी शिक्षिका व अभिनेत्री वर्षा दांदळे यांची नाशिक येथील त्यांच्या राहत्या घरी जाऊन भेट घेतली...’ वर्षा दांदळे यांनी पुढे असे लिहिले आहे की, ' मुख्यमंत्र्यांच्यावतीने महापौर पेडणेकर यांनी तब्येतीची आस्थेने विचारपूस केली. तसेच पुन्हा आपण चित्रपट क्षेत्रात नव्या उत्साहाने, उमेदीने काम करून प्रेक्षकांचे मनोरंजन करावे, अशा शुभेच्छा दिल्या. यासोबतच आजारातून लवकर बरे होण्यासाठी ईश्वरचरणी प्रार्थना केली. याप्रसंगी नगरसेविका सिंधू मसुरकर उपस्थित होत्या. धन्यवाद मुख्यमंत्री साहेब, धन्यवाद महापौर मॅडम कलाकाराला तुमच्या राज्यात मान आहे प्रेम आहे शतशः प्रणाम.’ असा झाला अपघात वर्षा यांनी नुकतीच ईटाइम्सला मुलाखत दिली आहे. या मुलाखतीमध्ये त्यांनी अपघात कसा झाला याची माहिती दिली आहे. 'मी एका पुरस्कार सोहळ्याहून परत येत होते. माझ्यासोबत आणखी काही अभिनेत्री होत्या आणि आमच्या गाडीचा वेग नियंत्रणात होता. अचानक एक गाडी समोरून आली आणि ती गाडी आमच्या गाडीवर येऊन आदळली. त्यानंतर काय झाले मला आठवत नाही. पण मला सगळ्यांचा आवज ऐकू येत होता. माझ्यासोबत असेल्या अभिनेत्रींना देखील दुखापत झाली होती' असे वर्षा यांनी सांगितले.
