म. टा. विशेष प्रतिनिधी, 'मुंबईचे माजी पोलिस आयुक्त यांचा काहीच थांगपत्ता लागत नसल्याने आयोगाने काढलेले जामीनपात्र अटक वॉरंट त्यांना बजावता आले नाही', असा अहवाल सीआयडीतर्फे बुधवारी चांदिवाल आयोगासमोर देण्यात आला. त्यामुळे आयोगाने त्याची दखल घेत या प्रकरणात पुढील सुनावणी १८ ऑक्टोबरला ठेवली. माजी गृहमंत्री अनिल देशमुख यांच्याविरोधातील भ्रष्टाचाराच्या आरोपांविषयी चौकशी करणाऱ्या, मुंबई उच्च न्यायालयाचे निवृत्त न्या. कैलाश चांदिवाल यांच्या आयोगासमोर जबाब नोंदवण्यासाठी परमबीर टाळाटाळ करत आहेत. वारंवार समन्स बजावूनही ते हजर न राहिल्याने आयोगाने त्यांच्याविरोधात यापूर्वी दोनदा जामीनपात्र अटक वॉरंट बजावले. मात्र, दुसरे वॉरंटही पोलिसांना बजावता आले नाही. 'परमबीर याचा ठावठिकाणा शोधून काढण्याचा आम्ही खूप प्रयत्न केला. परमबीर यांनी ज्या डॉक्टरांकडून वेळोवेळी वैद्यकीय उपचार घेतले त्यांच्याशीही आम्ही संपर्क साधला. मात्र, त्यांनाही त्यांचा काहीच ठावठिकाणा माहीत नाही. परिणामी काहीच थांगपत्ता लागत नसल्याने वॉरंट बजावता आलेले नाही', असे सीआयडीने आपल्या अहवालात स्पष्ट केले. त्यानंतर देशमुख यांचे वकील व देशमुख यांचे स्वीय सचिव संजीव पलांडे यांचे वकील या दोघांनी परमबीर यांच्याविरोधात अजामीनपात्र अटक वॉरंट काढण्यासह त्यांची संपत्ती जप्त करण्याचा आदेश काढावा, अशी विनंती आयोगाला केली. मात्र, आयोगाने हे दोन्ही अर्ज प्रलंबित ठेवून पुढील सुनावणी १८ ऑक्टोबरला ठेवली.
