मुंबई : फिनटेक क्षेत्रातील देशातील आघाडीची कंपनी असलेली पेटीएम कंपनी आज भांडवली बाजाराचा उंबरठा ओलांडणार आहे. तब्बल १८३०० कोटींचे भांडवल उभारण्यात यशस्वी झालेली पेटीएम गुंतवणूकदारांना बंपर लिस्टिंगमधून किती फायदा मिळवून देते याकडे सर्वांचे लक्ष लागले आहे. आज गुरुवारी मुंबई शेअर बाजारात (बीएसई) सकाळी ९ वाजल्यापासून पेटीएमचा लिस्टिंग सोहळा आयोजित करण्यात आला आहे. या सोहळ्याला पेटीएमचे व्यवस्थापकीय संचालक आणि मुख्य वित्तीय आधिकारी मधुर देवरा उपस्थित राहणार आहेत. समभाग विक्री योजनेतून पेटीएमने १८३०० कोटींचे शेअर विक्रीसाठी उपलब्ध केले होते. कंपनीचे बाजार मूल्य १.३९ लाख कोटी आहे. आयपीओसाठी कंपनीने प्रती शेअर २०८० ते २१५० रुपये किंमतपट्टा निश्चित केला होता. पेटीएमचा आयपीओ १.८९ पटीने सबस्क्राईब झाला होता. आतापर्यंतचा शेअर बाजारातला हा सर्वात मोठा आयपीओ ठरला आहे. ग्रे मार्केटमध्ये मात्र पेटीएमच्या शेअर प्रिमियममध्ये घसरण झाली आहे. लिस्टिंगपूर्वीच ग्रे मार्केटमध्ये पेटीएमच्या शेअरचा प्रीमियम घसरला आहे. कंपनीचे बाजार मूल्य अवास्तव आहे जे संस्थात्मक गुंतवणूकदारांना खटकत असल्याने ग्रे मार्केटमधील पेटीएमच्या शेअरची मागणी कमी झाली आहे. शेअर बाजार विश्लेषकांच्या मते पेटीएम आज निराशाजनक सुरुवात करण्याची शक्यता आहे. कंपनीला प्रचंड तोटा झाला आहे. त्यामुळे कंपनीचे बाजार मूल्य अवास्तव दर्शवण्यात आले आहे. ज्यामुळे कदाचित पेटीएमची आज इश्यू प्राईसच्या तुलनेत कमी किमतीवर नोंदणी होण्याची शक्यता आहे. शेअर इंडियाचे विश्लेषक रवी सिंग यांच्या मते पेटीएम इश्यू प्राईसच्या तूलनेत २० टक्के अधिक दराने खुला होईल. तो २१०० ते २७०० रुपयांच्या दरम्यान लिस्ट होण्याची शक्यता त्यांनी व्यक्त केले. तसे झाल्यास किरकोळ गुंतवणूकदारांनी नफा कमावून त्यातून बाहेर पडावे असा सल्ला त्यांनी दिला आहे.
