मुंबई : दक्षिण आफ्रिकेत करोनाचा नवा घातक विषाणू आढळून आल्यानंतर जगभरात एकच खळबळ उडाली आहे. या वृत्तानंतर कमॉडिटी बाजारात ब्रेंट क्रूडच्या किमतीत मोठी पडझड झाली. तेलाचा भाव तब्बल ११ टक्क्यांनी घसरला. मात्र असे असूनही आज शनिवारी पेट्रोलियम कंपन्यांनी कपातीबाबत मौन बाळगले. कंपन्यांनी आज सलग २३ व्या दिवशी देशात पेट्रोल आणि डिझेल दर स्थिर ठेवले आहेत. आज शनिवारी मुंबईत एक लीटर पेट्रोलचा भाव १०९.९८ रुपयांवर स्थिर आहे. दिल्लीत पेट्रोल १०३.९७ रुपये आहे. चेन्नईत पेट्रोलचा भाव १०१.४० रुपये आहे. कोलकात्यात एक लीटर पेट्रोल १०४.६७ रुपयांवर स्थिर आहे. मुंबईत एक लीटर डिझेलचा भाव ९४.१४ रुपये आहे. दिल्लीत डिझेल ८६.६७ रुपये इतके आहे. चेन्नईत आज डिझेलचा भाव प्रती लीटर ९१.४३ रुपये असून कोलकात्यात डिझेलचा भाव ८९.७९ रुपये आहे. दरम्यान , केंद्र सरकारने दिवाळीत पेट्रोल आणि डिझेलवरील उत्पादन शुल्कात कपात केली होती. परिणामी पेट्रोल सरासरी ५ रुपयांनी तर डिझेल १० रुपयांनी स्वस्त झाले होते. जवळपास २३ राज्ये आणि केंद्रशासीत प्रदेशांनी इंधनावरील मूल्यवर्धीत करात कपात करुन केंद्र सरकारच्या आवाहनाला प्रतिसाद दिला होता. मात्र त्यानंतर सलग तीन आठवडे पेट्रोलियम कंपन्यांनी ठेवण्याची भूमिका घेतली आहे. ज्यामुळे जागतिक बाजाराशी इंधन दर संलग्न असताना कच्च्या तेलातील स्वस्ताईपासून ग्राहकांना वंचित रहावे लागत आहे. कमॉडिटी बाजारात कच्च्या तेलाच्या किमतीत शुक्रवारी मोठी घसरण झाली. सलग चौथ्या सत्रात कच्चे तेल स्वस्त झाले. डब्ल्यूटीआय क्रूडचा भाव १३ टक्क्याने घसरला आणि तो थेट ६८.१५ डॉलर प्रती बॅरल इतका खाली आला आहे. तर ब्रेंट क्रूडच्या किमतीत ११.५५ टक्के घसरण झाली. ब्रेंट क्रूडचा भाव प्रती बॅरल ७२.७२ डॉलर इतका झाला आहे. दक्षिण आफ्रिकेतील करोनाचा नवा विषाणू यापूर्वीपेक्षा घातक असल्याचे बोलले जाते. त्यामुळे नजीकच्या काळात लॉकडाउनचे संकट गडद बनले आहे.या वृत्ताने जगभरातील भांडवली आणि कमॉडिटी बाजारात प्रचंड पडझड झाली. धास्तावलेल्या गुंतवणूकदारांनी पैसे काढून घेण्याचा सपाटा लावला.
