वृत्तसंस्था : मुंबई शेअर बाजार आणि राष्ट्रीय शेअर बाजाराच्या निर्देशांकांची पडझड सलग चौथ्या सत्रात कायम राहिली. सोमवारी, आठवड्याच्या पहिल्याच सत्रात ‘सेन्सेक्स’मध्ये ११७० अंकांची घसरण नोंदवली गेल्याने गुंतवणूकदारांमध्ये चिंतेचे वातावरण पसरले. ‘सेन्सेक्स’ची ही गेल्या सात महिन्यांतील सर्वांत मोठी घसरण ठरली. ‘सेन्सेक्स’प्रमाणे ‘निफ्टी’ही १.९६ टक्क्यांनी म्हणजेच ३४८ अंकांनी घसरला. दिवसअखेरीस ‘सेन्सेक्स’ ५८,४६५.८९ अंकांवर आणि ‘निफ्टी’ १७,४१६.५५वर स्थिरावला. युरोपातील काही देशांत नव्याने लागू होत असलेला लॉकडाउन, जागतिक बाजारांतून मिळालेले कमजोर संकेत आणि ‘रिलायन्स’-‘सौदी अरामको’ यांच्यातील करार रद्द होणे ही निर्देशांकांच्या पडझडीची प्रमुख कारणे ठरली. बाजाराचे नेतृत्त्व करणाऱ्या ‘रिलायन्स’ समूहाने ‘सौदी अरामको’ या कंपनीबरोबरचा प्रस्तावित करार रद्द केल्याची घोषणा शुक्रवारी रात्री केली. या करारानुसार ‘रिलायन्स’च्या तेल शुद्धिकरण आणि पेट्रोकेमिकल व्यवसायातील २० टक्के हिस्सा ‘सौदी अरामको’ला १५ अब्ज डॉलरला विकण्यात येणार होता. मात्र आमच्या समूहाच्या व्यवसायाचे स्वरूप बदलत असल्याने या कराराचा पुन्हा आढावा घेण्यात येईल, असे ‘रिलायन्स’ने म्हटले होते. या घोषणेनंतरच्या पहिल्याच सत्रात, सोमवारी ‘रिलायन्स’चे समभाग गडगडणार हे अपेक्षित होते. मात्र, हे समभाग ४.३५ टक्क्यांनी घसरल्याने बाजारालाही हादरे बसले. ‘रिलायन्स’च्या घसरणीचा इतर समभागांवरही परिणाम झाला. ‘रिलायन्स’चा समभाग १०७ रुपयांनी घसरून २,३६५ रुपयांवर स्थिरावला. गुंतवणूकदारांना भरघोस परतावा देणारे ‘बजाज फायनान्स’ आणि ‘बजाज फिनसर्व्ह’ हे तगडे समभागही अनुक्रमे ५.६ आणि ४.८ टक्क्यांनी घसरले. याशिवाय ‘एनटीपीसी’, ‘टायटन’, ‘स्टेट बँक’ आदींच्या समभागांचे मूल्यही घटले. नव्याने सूचिबद्ध झालेल्या ‘पेटीएम’च्या समभागाची पडझड सलग दुसऱ्या सत्रांतही कायम होती. सोमवारी हा समभाग १३ टक्क्यांनी कोसळला. निर्देशांकांत घसरण होत असतानाच ‘भारती एअरटेल’, ‘एशियन पेंट्स’, पॉवरग्रिड आणि इंड्सइंड बँकेच्या समभागांनी मात्र वृद्धी साधली. ‘एअरटेल’ने आपल्या विविध प्लॅनमध्ये दरवाढ जाहीर केल्याचा लाभ या समभागाला ३.७८ टक्क्यांच्या वाढीसह हा समभाग ७४१ रुपयांवर पोहोचला. कृषी कायद्यांसंबंधी निर्णयाचेही पडसाद पंतप्रधान नरेंद्र मोदी यांनी वादग्रस्त कृषी कायदे रद्द करत असल्याची घोषणा शुक्रवारी केली होती. बाजारात या निर्णयाचेही पडसाद उमटले. प्रामुख्याने सरकारी बँकांच्या समभागांना या निर्णयाचा फटका बसला. सरकारी बँकांच्या निफ्टी निर्देशांकांत ४.५१ टक्क्यांची घसरण नोंदवली गेली. तिसऱ्या लाटेची चर्चा करोना संसर्गित रुग्णांचे प्रमाण वाढत असल्याने ऑस्ट्रियाने टाळेबंदी लागू करण्याचे संकेत दिले आहेत. याशिवाय जर्मनी, स्लोव्हाकिया, चेक प्रजासत्ताक, बेल्जियम या देशांमध्येही सुरक्षात्मक उपाययोजना लागू होण्याची शक्यता आहे. जागतिक बाजारांमध्ये यामुळे काळजीचे वातावरण असून भारतीय गुंतवणूकदारांनीही त्याची धास्ती घेतल्याचे दिसून आले. ७.८६ लाख कोटींचे नुकसान ‘सेन्सेक्स’मध्ये केवळ एकाच सत्रात ११७०.१२ अंकांची पडझड झाल्याने गुंतवणूकदारांच्या भांडवलात एकूण ७.८६ लाख कोटी रुपयांची घट झाली. ‘बाजारात आणखी काही दिवस अस्थिरता कायम राहील. फ्युचर आणि ऑप्शन सौद्यांचा चालू महिन्यातील अखेरचा दिवस (एक्स्पायरी) याच आठवड्यात गुरुवारी असल्यानेही निर्देशांकांवर मोठा दबाव असेल,’ असे बाजार विश्लेषकांनी म्हटले आहे.
