कानपूर: उत्तर प्रदेशच्या कानपूरमध्ये एका पोलीस अधिकाऱ्याला त्याच्या पत्नीने एका हॉटेलमध्ये गर्लफ्रेंडसोबत रंगेहाथ पकडले. महिला सशक्तीकरण कार्यक्रमात सहभागी झालेल्या पोलीस अधिकाऱ्याला त्याच्या पत्नीने रंगेहाथ पकडल्याने या घटनेची जोरदार चर्चा संपूर्ण शहरात सुरू आहे. आता पत्नीने पोलीस अधिकारी असलेल्या पतीविरोधात वरिष्ठ अधिकाऱ्यांकडे तक्रार केली आहे. मिळालेल्या महितीनुसार, ही घटना कानपूरच्या ग्वालटोली पोलीस ठाण्याच्या हद्दीत घडली. या परिसरात राहणाऱ्या एका पोलीस अधिकाऱ्याला त्याच्या पत्नीने अन्य एका महिलेसोबत अश्लील चाळे करताना हॉटेलमध्ये रंगेहाथ पकडले. पत्नी दीडशे किलोमीटरवरून या हॉटेलवर येऊन धडकली होती. त्यानंतर पतीला तिने मारहाण केली. पतीनेही तिला मारहाण केली. पत्नीने याबाबतची तक्रार वरिष्ठ पोलीस अधिकाऱ्यांकडे केली आहे. पत्नीने तक्रार केल्यानंतर पोलीस आयुक्तांनी पोलीस ठाण्याच्या प्रभारींकडे या घटनेच्या तपासाचा अहवाल मागितला आहे. मिळालेल्या माहितीनुसार, पोलीस अधिकारी परिसरातीलच एका हॉटेलमध्ये थांबला होता. त्याच्याविरोधात पोलिसांनी कारवाई केली आहे. या पोलीस अधिकाऱ्याला निलंबित करण्यात आले आहे. धक्कादायक बाब म्हणजे, ज्यावेळी या पोलीस अधिकाऱ्याला महिलेसोबत हॉटेलमध्ये रंगेहाथ पकडले, त्याचवेळी या परिसरातील पोलीस एका महिला सशक्तीकरण कार्यक्रमात सहभागी झाले होते. दरम्यान, या प्रकरणात हॉटेल मॅनेजरने प्रतिक्रिया दिली आहे. पोलीस निरीक्षक हे हॉटेलात आल्यानंतर हाय-पाय धुतल्यानंतर लगेच निघून जायचे. दुसरीकडे अन्य पोलीस कर्मचाऱ्यांचे म्हणणे आहे की, पोलीस अधिकाऱ्याला महिलेसोबत रंगेहाथ पकडल्यानंतर मारहाण झाली आहे. त्यात त्याच्या हाताला दुखापत झाली आहे. परिसरात या घटनेची जोरदार चर्चा असून, पोलीस चौकशी करत आहेत.
