मुंबई: खासदार नवनीत राणा आणि आमदार रवी राणा यांच्या खार परिसरातील घराबाहेर शिवसैनिक सध्या प्रचंड आक्रमक झाले आहेत. शिवसैनिकांनी या परिसरात पोलिसांनी लावलेले बॅरिकेटस तोडून थेट राणा दाम्पत्याच्या इमारतीपर्यंत मजल मजल मारली. शिवसैनिकांनी हल्लाबोल करताच राणा दाम्पत्य लगेच फेसबुकवर लाईव्ह गेले. यामध्ये सुरुवातीला राणा दाम्पत्य पूर्जाअर्चा करताना दिसत होते. त्यानंतर रवी राणा यांनी शिवसेना आणि मुख्यमंत्री उद्धव ठाकरे यांच्यावर जोरदार हल्ला चढवला. उद्धव ठाकरे यांच्या कार्यकाळात महाराष्ट्राला साडेसाती लागली आहे. ही साडेसाती संपवण्यासाठी आम्हाला मातोश्रीवर जाऊन हनुमान चालिसेचे पठण करायचे होते. मात्र, पोलीस आम्हाला थांबवत आहेत. शिवसैनिक आमच्या दारापर्यंत येऊन उभे राहिले आहेत. हा गुंडगिरीचा प्रयत्न आहे. महाराष्ट्रात कायद्याचे राज्य आहे. मात्र, या परंपरेला बट्टा लावण्याचा प्रयत्न होत आहे. मुख्यमंत्री उद्धव ठाकरे यांनीच शिवसैनिकांना माझ्या घरावर हल्ला करण्यास सांगितले. तेच कायदा-सुव्यवस्था बिघडवत आहेत, असा आरोप रवी राणा यांनी केला. तसेच महाराष्ट्राला लागलेली साडेसाती दूर करण्यासाठी आम्ही मातोश्रीवर जाऊन हनुमान चालिसा पठण करणारच, असेही रवी राणा यांनी म्हटले. मातोश्री आमच्यासाठी श्रद्धास्थान आहे. बाळासाहेब ठाकरे हे आमचे दैवत आहेत. त्यामुळे महाराष्ट्राला लागलेली साडेसाती दूर करण्यासाठी आम्हाला मातोश्रीवर जाऊन हनुमान चालिसा वाचायची होती. मी मराठी माणूस आहे. तरीह मला मुंबईत हनुमान चालिसा वाचण्यापासून थांबवण्याचा प्रयत्न होत आहे. मुख्यमंत्री उद्धव ठाकरे सत्तेचा दुरुपयोग करत आहेत. आम्हाला विरोध करणारे बाळासाहेबांच्या विचाराचे शिवसैनिक नाहीत, असेही रवी राणा यांनी म्हटले. राणा दाम्पत्य खारमधील ज्या इमारतीत राहत आहेत त्या इमारतीला सध्या शिवसैनिकांचा वेढा पडला आहे. त्यामुळे आता राणा दाम्पत्य घरातून कसे बाहेर पडणार का, हे पाहावे लागेल. तसेच राणा दाम्पत्याने १४९ च्या नोटीसचे उल्लंघन केल्यास पोलीस त्यांच्यावर कारवाई करणार का, हेदेखील पाहावे लागेल.
