बारामती : राष्ट्रवादीचे आमदार रोहित पवार ( ) यांच्या ग्रीन एकर कंपनीची ईडीकडून चौकशी करण्यास ( ) सुरुवात झाली आहे. यावर रोहित पवार यांनी प्रतिक्रिया दिली आहे, तपास यंत्रणेकडून नेमकी कशाची चौकशी सुरू आहे, याबाबत अद्याप मला माहिती नाही. माहिती मिळताच लवकरच याबाबत स्पष्टीकरण देईल. तसेच तपास यंत्रणेला सहकार्य करेल, असे रोहित पवार म्हणाले. या आधीही केंद्रीय तपास यंत्रणेने केलेल्या चौकशीला सहकार्य केले आहे. तसेच यावेळीही सहकार्य करेल, असे रोहित पवार यांनी सांगितले. कर्जत-जामखेड मतदारसंघात पालकमंत्री पानंद रस्ते योजना व रोजगार हमी योजनेंतर्गत पानंद रस्ते कामात सुमारे वीस कोटी रुपयांचा अपहार झाल्याची तक्रार करण्यात आली आहे. या प्रकरणी विधान परिषदेचे आमदार राम शिंदे यांनी पुढाकार घेतला असून सरकारने समिती नियुक्त करून चौकशीचे आदेश दिले आहेत. यावरही आमदार पवार यांनी स्पष्टीकरण दिले आहे. सदरचे रस्ते डीपीसीच्या माध्यमातून मिळालेले रस्ते नसून सरकारच्या मदतीने मिळालेली कामे आहेत. सदर रस्त्यांची कामे राज्यातील सर्वात कमी पर किलोमीटर दराने करण्यात आली आहेत. या रस्त्यांचा अडीच लाख शेतकरी व नागरिकांना फायदा झाला आहे, असे ते म्हणाले. या भागातील मंत्री महोदय पूर्वी जे होते तेच आता आहेत. काही लोक सकारात्मक विकासाच्या मुद्द्यावर चर्चा करत असतात तर काही लोक रडीचा डाव खेळत असतात. माझे विरोधक जरी जनतेतून निवडून आले नसले तरी मागच्या दारातून ते आमदार झाले आहेत, असा टोला रोहित पवारांनी राम शिंदेंना लगावला आहे. लोकांना काय पाहिजे. हे माझ्यासारख्या सामाजिक कार्यकर्त्याला माहित आहे. म्हणून लोकांनी मला निवडून दिले आहे. या रस्त्यांबाबत जे कोणी चौकशी करतील तेव्हा सत्य समोर येईल. विरोधकांना काम करताना माझ्या इतके काम करता आले नाही. आणि पुढेही करता येणार नाही. त्यामुळे ते असा रडीचा डाव खेळत असल्याची टीका आमदार रोहित पवारांनी आमदार प्रा. राम शिंदेंवर केली आहे.
