वृत्तसंस्था, नवी दिल्लीः आंतरराष्ट्रीय बाजारात कच्च्या इंधनाच्या किंमती सात महिन्यांतील नीचांकी पातळीवर आल्या आहेत. मात्र, देशात पेट्रोल आणि डिझेलच्या किरकोळ विक्री दरांस त्याचा काहीही लाभ झाल्याचे दिसत नाही. सरकारी इंधन कंपन्यांनी तोटा भरून काढण्यासाठी दर तेवढेच ठेवल्याने ही स्थिती निर्माण झाली आहे. ब्रेंट क्रूडचा दर गेल्या आठवड्यात प्रति बॅरल ९० डॉलरपेक्षा कमी नोंदवला गेला. फेब्रुवारीच्या सुरुवातीलाही मंदीच्या भीतीने इंधनाचे दर घसरले होते. त्यानंतर त्यांत सुधारणा झाली आणि गेल्या सहा महिन्यांत हा दर ९२.८४ प्रति बॅरलपर्यंत खाली आला होता. तेल उत्पादक व निर्यातदार देशांची संघटना ‘ओपेक’ने इंधन उत्पादन घटवल्यानंतरही त्याचे दर घसरले. मात्र देशातील पेट्रोल आणि डिझेलच्या किरकोळ विक्री दरांमध्ये घट झाली नसून, गेल्या १५८ दिवसांपासून हे दर स्थिर आहेत. आंतरराष्ट्रीय बाजारात इंधनाचे दर उच्चांकी होते, तेव्हा आपल्याकडील दर कमीच होते,’ असे केंद्रीय पेट्रोलियम मंत्री हरदीपसिंग पुरी यांनी शुक्रवारी म्हटले होते. ‘आपण सर्व तोटा भरून काढला का,’ असा प्रश्नही त्यांनी विचारला. पेट्रोल, डिझेलचे दर सहा एप्रिलपासून स्थिर ठेवल्यानंतरही किती तोटा भरून निघाला याचा तपशील मात्र त्यांनी दिला नाही. भारताने ८ सप्टेंबरला आयात केलेल्या क्रूड इंधनाचा दर प्रति बॅरल ८८ डॉलर होता, तर एप्रिलमध्ये हा दर सरासरी १०२.९७ डॉलर होता. मेमध्ये त्यात वाढ होऊन हा दर १०९.५१ डॉलर प्रति बॅरल, तर जूनमध्ये ११६.०१ डॉलर प्रति बॅरल झाला होता. त्यानंतर जुलैपासून दरांत घसरण सुरू झाली. क्रूड इंधनाचा जुलैमधील सरासरी दर १०५.४९ डॉलर, ऑगस्टमध्ये ९७.४० डॉलरपर्यंत खालावला. आता सप्टेंबरमध्ये हा सरासरी दर ९२.८७ डॉलरपर्यंत कमी झाला आहे. उत्पादन शुल्कात वाढ नवी दिल्ली : पेट्रोलवरील उत्पादन शुल्कात २०१४-१५ ते २०२१-२२ या काळात १९४ टक्के वाढ झाली असून, डिझेलवरील उत्पादन शुल्कात याच कालावधीत ५१२ टक्के वाढ झाली आहे. क्रूड इंधनाचे दर २०१५-१६ ते २०२१-२२ या काळात ८० डॉलर प्रति बॅरलपर्यंत खालावूनही वाढलेल्या उत्पादन शुल्काचा भार नागरिकांवर पडला आहे. पेट्रोलवरील उत्पादन शुल्काचा आकडा प्रति लिटर २७.९० रुपयांवर पोहोचला. त्याच वेळी डिझेलवरील उत्पादन शुल्काचा आकडा २१.८० रुपये झाला.
