जळगाव : मुक्ताईनगर ते बऱ्हाणपूर महामार्गावर कुंड गावाजवळील पुलाच्या खालील बाजूस २९ ऑगस्ट रोजी एका महिलेचा मृतदेह आढळून आला होता. या मृत महिलेची ओळख पटली आहे. प्रभा माधव फाळके (वय ६३) रा.गणपती नगर, मलकापूर असं या महिलेचे नाव आहे. सिनेस्टाईल घडलेल्या या खूनाच्या घटनेचा मुक्ताईनगर पोलिसांनी पर्दाफाश केला आहे. दागिन्यांसाठी या महिलेचा तिच्या शेजारी राहणाऱ्या दोघा बापलेकांनी खून केल्याचे स्पष्ट झालं असून पोलिसांनी दोघांच्या मुसक्या आवळल्या आहेत. विश्वास भास्कर गाढे (वय ५०) आणि भार्गव विश्वास गाढे (वय २१, रा.गणपती नगर, मलकापूर) असं अटकेतील दोघा संशयितांचे नावे आहेत. मलकापूरमधील नगर परिषदेमधील सेवानिवृत्त कर्मचारी महिला श्रीमती प्रभा माधव फाळके यांची अतिशय क्रूरपणे हत्या केल्यानंतर त्यांचा मृतदेह हा जाड प्लास्टिकच्या कॅरीबॅगमध्ये भरून मुक्ताईनगर ते बऱ्हाणपूर महामार्गावर संत मुक्ताबाई साखर कारखान्याच्या पुढे कुंड गावाजवळील पुलाच्या खाली फेकून देण्यात आला होता. याप्रकरणी पोलिसांनी पंचनाम्याची प्रक्रिया पूर्ण करून अज्ञात आरोपीविरुद्ध खूनाचा गुन्हा दाखल करून सदर महिलेची ओळख पटवण्याचे आवाहन केले होते. मुक्ताईनगर पोलिसांनी मलकापूर पोलीस ठाण्याच्या पोलीस निरीक्षकांना फोटो पाठवले. यात ही महिला मलकापूर येथील प्रभा फाळके असल्याचे निष्पन्न झाले होते. प्रभा फाळके या २७ ऑगस्ट रोजी परिसरातच असलेल्या मंदिरामध्ये पूजेची थैली घेऊन दर्शनासाठी जात असल्याचे मुलाला व सुनेला सांगून घरून निघून गेल्या होत्या. मात्र त्यानंतर त्या घरी परतल्याच नसल्याचे पोलिसांच्या तपासात समोर आले होते. त्यानुसार पोलिसांनी तपासचक्रे फिरवली. ३१ ऑगस्ट रोजी मुक्ताईनगर उपविभागीय पोलीस अधिकारी कुणाल सोनवणे, स्थानिक गुन्हे शाखा पोलीस निरीक्षक किरणकुमार बकाले, मुक्ताईनगर पोलीस निरिक्षक शंकर शेळके, , पो.कॉ.रवि धनगर, धर्मेंद्र ठाकूर, राहुल बेहरवाल, नितिन व्यवहारे हे मलकापूर शहरात दाखल झाले. नियोजनबद्धरित्या तपासचक्रे वेगाने फिरवत फाळके यांच्या घराशेजारी राहणाऱ्या विश्वास भास्कर गाढे आणि भार्गव विश्वास गाढे या दोघा बापलेकांना पोलिसांनी ताब्यात घेतले. मृत प्रभा फाळके या ज्या रस्त्याने केल्या होत्या, त्या ठिकाणचे सीसीटीव्ही फुटेज, त्यांच्या मोबाईलचे कॉल डिटेल्स, यासह मलकापुरातील मुथुट गोल्ड फायनान्स येथील माहिती या सर्व पुराव्यांच्या आधारावर प्रभा फाळके यांचा खून भार्गव गाढे तसेच त्याचे वडील विश्वास गाढे यांनी केल्याचे निष्पन्न झाले. अस होतं हत्येमागील कारण प्रभा शेळके यांच्या अंगावरील सोन्याच्या दागिन्यांसाठी बापलेकांनी त्यांच्या राहत्या घरात प्रभा फाळके यांचा निर्घृण खून करुन त्यांच्या गळ्यातील पोथ, गोफ, अंगठी असा दोन लाखांचा मुद्देमाल काढून घेतला आणि फाळके यांचा मृतदेह पुर्णा नदीवरील पुलाखाली फेकून दिल्याचे चौकशीत समोर आले. वडिलांना दारूचे व्यसन आहे. तसंच माझ्यावरही ५० हजार रुपयांचं कर्ज होतं. वडिलांनी दारूच्या नशेत २७ तारखेला प्रभा फाळके यांच्या डोक्यात लोखंडी रॉड घालून ठार करत अंगावरचे सोने काढून घेतले. त्यानंतर मृतदेह फेकून दिला, अशी कबुली भार्गव याने पोलिसांकडे दिली आहे.
