पुणे : महाराष्ट्राच्या खाद्य संस्कृतीमध्ये केक हा पदार्थ नव्हता. गेल्या काही वर्षांपासून राज्यात बेकरी पदार्थांचे प्रमाण वाढले आहे. एखाद्याचा वाढदिवस साजरा करायचा असेल किंवा एखाद्या गोष्टीचा आनंद साजरा करायचा असेल तर बेकरी तयार झालेल्या केकचा वापर वाढला होता. राज्यात दीड वर्षांपासून फळांपासून केक बनवण्याचा प्रयोग काही शेतकऱ्यांप्रती आस्था असणाऱ्या युवक युवतींनी सुरू केला होता. सध्या पुण्यातील अशाच एका केकची चर्चा सुरु आहे. पुण्यातील ने नव्या केकची निर्मिती केली आहे. हा केक पेरू पासून बनवण्यात आला आहे. पुण्यातील कयानी बेकरी ने यासाठी पुरंदर तालुक्यात मुबलक प्रमाणात उत्पादित होणाऱ्या रत्नदीप या पेरूच्या वाणाची निवड केली आहे. यामुळे पुरंदर च्या शेतकऱ्यांसाठी ही गोष्ट अभिमानाची ठरली आहे. पुरंदर तालुक्यातील शेतकरी आणि पुण्यातील कयानी बेकरी यानी एकत्र येत हा प्रयोग केला आहे. त्यांनी एकत्र येत पुरंदर पेरु केकची निर्मिती केली आहे. या केकची चव ही विशेष असून लाल गर असणाऱ्या पेरुपासून याची निर्मिती करण्यात आली आहे. पुरंदर परिसरात पिकणाऱ्या रत्नदीप या वाणाच्या पेरुचा गर लाल असतो. पुरंदर हायलँडस शेतकरी उत्पादक कंपनीचे प्रमुख राहुल उरसळ यांनी या सर्व प्रक्रियेमध्ये कयानी बेकरीचे रुस्तम कयानी यांनी मार्गदर्शन केल्याचं सांगितलं. पुण्यातील कयानी बेकरी ही प्रसिद्ध बेकरीपैकी एक म्हणून ओळखली जाते. कयानी बेकरी स्ट्रॉबेरीच्या बिस्किटांसाठी प्रसिद्ध आहे. आता त्यांनी पुण्याच्या बाजारपेठेत लाँच करुन पुढचं पाऊळ टाकलं आहे. यामुळं पेरु उत्पादक शेतकऱ्यांना नवा ग्राहकवर्ग निर्माण होणार आहे. आंब्याचा फ्लेवर असणारे केक उपलब्ध आहेत. आता पेरुचा स्वाद असणारे केक देखील ग्राहकांना मिळणार आहेत. पुरंदर हायलँड्स एफपीसी लिमिटेड साठी देखील पुरंदर पेरु केकची निर्मिती महत्त्वाची ठरली आहे. यामुळं स्थानिक पिकाला राष्ट्रीय, आंतरराष्ट्रीय बाारपेठेत स्थान मिळून शेतकऱ्यांना फायदा होणार आहे. ही शेतकरी उत्पादक कंपनी अंजीर आणि सफरचंद निर्यातीचा देखील प्रयत्न करणार आहे. सुप्रिया सुळे यांच्याकडून अभिनंदन पुण्यातील प्रसिद्ध कयानी बेकरीने पेरु केक लॉन्च केला. यासाठी वापरले जाणारे रत्नदिप हे पेरुचे वाण पुरंदर परिसरात मुबलक पिकते. पुरंदर हायलँड्स एफपीसी लिमिटेडच्या रेड पेरू स्प्रेडपासून हा केक तयार करण्यात आला आहे. कयानींचे नवे उत्पादन ग्राहकांना नक्की आवडेल व त्या माध्यमातून पुरंदरच्या मातीत पिकणारे हे फळ आणखी लोकप्रिय होईल हा विश्वास आहे.पुरंदरच्या कृषी उत्पादनांना आपल्या बेकरीत सामावून घेतल्याबद्दल कयानी बेकरीचे रुस्तम कयानी यांचे मनापासून आभार व रोहन उरसळ,अतुल कडलग व सहकाऱ्यांचे अभिनंदन करत असल्याची पोस्ट खासदार सुप्रिया सुळे यांनी केली आहे.
