मुंबई : ‘महिलांच्या लैंगिक छळवणुकीच्या कोणत्याही प्रकाराविरोधात कठोर भूमिकाच घेणे आवश्यक आहे. अशी प्रकरणे सहजतेने घेतली जाऊ शकत नाहीत’, असे निरीक्षण नोंदवत न्यायदंडाधिकारी न्यायालयाने १७ वर्षांपूर्वीच्या प्रकरणात ५१ वर्षीय आरोपीला नुकतीच एक वर्षाच्या कारावासाची शिक्षा ठोठावली. सहा वर्षीय मुलीला आक्षेपार्ह स्पर्श करून गैरवर्तणूक करत तिचा विनयभंग गेल्याचा आरोप आरोपीवर होता.लहान मुलांच्या लैंगिक शोषणाबद्दल कठोर शिक्षेची तरतूद असलेला पोक्सो कायदा २०१२मध्ये येण्यापूर्वी ही घटना घडली. त्यामुळे आरोपीविरोधात भारतीय दंड संहितेअंतर्गत विनयभंगाचे कलम लावण्यात आले होते. डबिंग आर्टिस्ट असलेल्या आरोपीविरोधात पीडित मुलीच्या कुटुंबीयांच्या तक्रारीवरून २००६मध्ये एफआयआर नोंदवण्यात आला. पीडितेने सन २०१८मध्ये ती १८ वर्षांची झाली असताना न्यायालयात साक्ष दिली. ‘घटनेची नेमकी तारीख आता आठवत नाही; परंतु, जवळच्याच इमारतीत राहत असलेल्या आजीच्या घरी मी, आई व आमच्या घरकामगारासोबत गेले होते. त्यावेळी आमच्या परिचयातीलच असलेल्या आरोपीचा माझ्या आजीला फोन आला. माझी मैत्रीण त्याच्या घरी खेळायला आली आहे, असे सांगत त्याने मलाही तिथे पाठवण्यास आजीला सांगितले. त्यानंतर आमची घरकामगार मला तिथे सोडून निघून गेली. तिथे थोडा वेळ खेळल्यानंतर माझी मैत्रीण घरी निघून गेली. पण आरोपीने मला तिथेच खेळण्याचा आग्रह धरला. मग तो माझ्यासोबत मोबाइल गेम खेळू लागला. प्रत्येक वेळी गेममध्ये हरल्याने विजेत्याच्या आज्ञेचे पालन करावे लागेल, असे त्याने सांगितले. पहिला गेम हरल्यानंतर त्याने मला त्याच्या गालावर चुंबन घेण्यास सांगितले. त्यानंतर मी पुन्हा हरल्याने त्याने आक्षेपार्ह कृती केली. असा स्पर्श आक्षेपार्ह असल्याचे माझ्या पालकांनी मला सांगितले आहे, असे मी सांगितले. पण त्याने ते कृत्य सुरूच ठेवले. त्यामुळे मी रडू लागले आणि तिथून पळ काढला. त्यानंतर मी रडत असल्याचे पाहून घरकामगाराने माझ्याकडे चौकशी केली. पण मी माझ्या पालकांनाच सर्व हकीगत सांगितली’, असे पीडितेने साक्षीत सांगितले. तिच्या आईने व घरकामगारानेही घटनाक्रम आपल्या साक्षीत नमूद केला. अखेर दोन्ही बाजू तपासल्यानंतर न्यायालयाने आरोपीला दोषी ठरवून शिक्षा ठोठावली.‘त्या आठवणींनी पीडितेला दु:स्वप्न’‘पीडित मुलगी आज एमबीबीएस पदवी घेऊन डॉक्टर बनली आहे. तिने २०१८मध्ये न्यायालयात साक्षीसाठी येऊन आरोपीला ओळखले. परंतु, ओळखीतीलच असलेल्या या आरोपीने तिचा जो लैंगिक छळ केला त्याच्या वाईट आठवणी आजही तिच्या स्मृतीतून गेलेल्या नाहीत. ती जेव्हा स्त्रीरोग विभागातील आपल्या रुग्णांची तपासणी करण्यासाठी जाते, तेव्हा त्या वाईट आठवणी जाग्या होतात. शिवाय त्या घटनेने तिला अनेक दु:स्वप्ने दिली’, असेही न्यायालयाने आपल्या निर्णयात नमूद केले.
