म. टा. वृत्तसेवा, नवी मुंबई : सिडकोच्या आंतरराष्ट्रीय विमानतळ प्रकल्पातील मुख्य भूमी व भूमापन कार्यालयातील क्षेत्र अधिकारी मुकुंद चंद्रकांत बंडा (५७) याला नवी मुंबई लाचलुचपत प्रतिबंधक विभागाच्या पथकाने तीन लाखांची लाच स्वीकारताना पकडल्याने एकच खळबळ उडाली. अशी आहे घटनामुकुंद बंडा याने नवी मुंबई आंतरराष्ट्रीय विमानतळ प्रकल्पासाठी संपादित करण्यात आलेल्या घराच्या मोबदल्यात, सिडकोकडून मिळणाऱ्या भूखंडाची पात्रता निश्चित करण्याचा प्रस्ताव मंजुरीसाठी पाठविण्यासाठी सात लाख रुपये लाचेची मागणी केली होती. यातील पहिला हप्ता स्वीकारताना त्याला सिडको कार्यालयात सापळा लावून पकडण्यात आले.नवी मुंबई आंतरराष्ट्रीय विमानतळाच्या उभारणीसाठी सिडकोने १० गावांचे व काही झोपडपट्ट्यांचे पुनर्वसन केले. विमानतळबाधित प्रकल्पस्तांना त्यांच्या संपादित करण्यात आलेल्या घराच्या मोबदल्यात, सिडकोकडून भूखंडाची पात्रता निश्चित करून त्यांना भूखंड देण्यात येत आहेत. यातीलच एका प्रकल्पग्रस्ताने आपला प्रस्ताव सिडकोच्या आंतरराष्ट्रीय विमानतळ प्रकल्पातील मुख्य भूमी व भूमापन कार्यालयात सादर केला. मात्र या कार्यालयातील अधिकाऱ्याने हा प्रस्ताव वरिष्ठ अधिकाऱ्यांकडे मंजुरीसाठी पाठविण्यासाठी क्षेत्र अधिकारी मुकुंद बंडा व मनोज यांच्यामार्फत १५ लाख रुपयांच्या लाचेची मागणी केली होती. त्यामुळे तक्रारदाराने नवी मुंबई लाचलुचपत प्रतिबंधक विभागाकडे तक्रार दाखल केली होती.या तक्रारीच्या अनुषंगाने पथकाने केलेल्या पडताळणीत क्षेत्र अधिकारी मुकुंद बंडा याने तक्रारदाराच्या भूखंडाची पात्रता निश्चित करण्याचा प्रस्ताव मंजुरीसाठी वरिष्ठांकडे पाठविण्यासाठी स्वत:सह आपले सहकारी मनोज पाटील व सचिन वैती यांच्यासाठी सात लाख रुपये लाचेची मागणी केल्याचे आढळून आले. तसेच त्याने तीन लाख रुपयांचा पहिला हप्ता स्वीकारण्याचेही कबूल केले. यांनतर लाचलुचपत प्रतिबंधक विभागाचे पोलिस उपअधीक्षक ज्योती देशमुख यांच्या मार्गदर्शनाखालील पथकाने गुरुवारी दुपारी सिडकोच्या कार्यालयात सापळा लावला. यावेळी क्षेत्र अधिकारी मुकुंद बंडा याने तक्रारदाराकडून तीन लाख रुपयांची रक्कम स्वीकारल्यानंतर त्याला पकडले.
