: दिल्लीजवळच्या गाझियाबादमधील मोदीनगरमध्ये होळीच्या उत्सवाला गालबोट लागलं. डीजेवर नाचणाऱ्या ३० वर्षीय तरुणाचा मृत्यू झाला. नाचता नाचता तरुण अचानक जमिनीवर कोसळला. त्याला तातडीनं रुग्णालयात दाखल करण्यात आलं. मात्र डॉक्टरांनी त्याला मृत घोषित केलं. हृदयविकाराच्या झटक्यानं तरुणाचा मृत्यू झाल्याचं डॉक्टरांनी सांगितलं. तरुणाच्या अकाली निधनामुळे परिसरावर शोककळा पसरली आहे.गाझियाबादच्या मोदीनगरमध्ये असलेल्या ग्रीनलँड शाळेजवळ होळीच्या निमित्तानं डीजे लावण्यात आला होता. परिसरातील तरुण डीजेच्या तालावर नाचत होते. ३० वर्षांच्या विनीतनंदेखील ठेका धरला होता. नाचता नाचता विनीत अचानक जमिनीवर कोसळला. त्याला रुग्णालयात नेण्यात आलं. मात्र डॉक्टरांनी त्याला मृत घोषित केलं. हृदयविकाराच्या झटक्यामुळे विनीतचा मृत्यू झाला. विनीतच्या निधनाबद्दल समजताच परिसरावर शोककळा पसरली. विनीतच्या कुटुंबावर दु:खाचा डोंगर कोसळला. विनीत पेशानं फोटोग्राफर होता. दिल्लीच्या भजनपुरामध्ये त्याचा स्टुडिओ आहे. 'आसपास राहत असलेल्या मित्रांसोबत होळी खेळण्यासाठी विनीत बुधवारी बाहेर पडला होता. त्याच्या घरापासून काही अंतरावर स्टेज उभारण्यात आलं होतं. तिथे डीजे लावण्यात आला होता. बुधवारी सकाळपासून तिथे २० पेक्षा अधिक तरुण नाचत होते,' अशी माहिती विनीतच्या नातेवाईकांनी दिली. 'विनीत बुधवारी दुपारी डीजेवर नाचत होता. सलग १५ मिनिटं त्यानं ठेका धरला. दुपारी तीनच्या सुमारास विनीतच्या छातीत दुखू लागलं. त्यामुळे विनीत नाचायचा थांबला. तो जवळच असलेल्या एका खुर्चीवर बसला. त्यानंतर तो घरी गेला आणि थोड्याच वेळात कोसळला,' असं विनीतच्या नातेवाईकानं सांगितलं. या प्रकरणात अद्याप तरी तरुणाच्या कुटुंबीयांना कोणतीही तक्रार दाखल केलेली नाही. त्यांनी तक्रार केल्यास कार्यवाही करण्यात येईल, अशी माहिती गाझियाबाद (ग्रामीण) विभागाचे पोलीस उपायुक्त रवी कुमार यांनी दिली.गाझियाबादमध्ये याआधीही हृदयविकारामुळे तरुणांचे मृत्यू झाल्याची घटना घडल्या आहेत. १८ ऑक्टोबरला ३८ वर्षीय जिम ट्रेनर एकाएकी कोसळला. त्याला रुग्णालयात दाखल करण्यात आलं. हृदयक्रिया बंद पडल्यानं त्याचा मृत्यू झाला.
