भोपाळ: मध्य प्रदेशच्या सागर जिल्ह्यातील बिनामध्ये मिशनरीकडून चालवल्या जाणाऱ्या निर्मल ज्योती कॉन्वेंट शाळेच्या प्रयोगशाळेत राज्य बाल संरक्षण आयोगाचे सदस्य पोहोचले. नियमित होणाऱ्या निरीक्षणाचा भाग म्हणून आयोगाच्या सदस्यांनी प्रयोगशाळेची पाहणी केली. त्यावेळी त्यांना एका बरणीत मानवी भ्रूण आढळून आलं. त्यांनी याची माहिती पोलिसांना दिली. पोलिसांनी भ्रूण ताब्यात घेऊन तपास सुरू केला आहे.प्रकरण काय?शैक्षणिक शुल्क न भरल्यानं निर्मल ज्योती कॉन्वेंट शाळेच्या मुख्याध्यापिकेनं एका मुलीला शाळेतून काढलं. तिच्या वडिलांनी ३ फेब्रुवारीला या प्रकरणी राज्य सरकारच्या बाल संरक्षण आयोगाकडे केली. याच प्रकरणात आयोगाचे सदस्य ओंकार सिंह, डॉ. निवेदिता शर्मा पाहणीसाठी बिनाला पोहोचले. मिशनरी स्कूलमध्ये सापडलं भ्रूणआयोगाच्या सदस्यांनी मुख्याध्यापिकेची चौकशी केली. मात्र त्यांची उत्तरं समाधानकारक नव्हती. त्यामुळे सदस्यांनी शाळेची कागदपत्रं तपासली, प्रयोगशाळेचं निरीक्षण केलं. तिथे त्यांना एका बरणीत मानवी भ्रूण सापडलं. ते पाहून त्यांना धक्काच बसला. हे भ्रूण किती जुनं आहे याची माहिती मुख्याध्यापिकेला देता आली नाही. यानंतर सदस्यांनी पोलिसांशी संपर्क साधला. शाळेच्या परिसरात गेस्ट रुम आहे. नियमांनुसार गेस्ट रुम शाळेच्या परिसरात असू शकत नाही. आयोगाच्या सदस्य आणि अधिकाऱ्यांना गेस्ट रुमपर्यंत जाऊ दिलं गेलं नाही, अशी माहिती डॉ. निवेदिता शर्मांनी दिली. शाळेतील सर्व कर्मचाऱ्यांची पोलीस पडताळणी करण्यात आलेली नाही. जमिनीचा वापर अन्य व्यवसायासाठी केला जात आहे. ही बाब नियमाला धरून नाही. शुल्कासाठी विद्यार्थी, पालकांवर दबाव टाकला जात आहे. हेदेखील चुकीचं आहे. प्रयोगशाळेत असलेले प्राण्यांचे, किटकांचे नमुने सडलेल्या स्थितीत आढळले. त्यांचं संवर्धन व्यवस्थित करण्यात आलेलं नाही, असं शर्मांनी सांगितलं.
