वृत्तसंस्था, नवी दिल्ली : सहा प्रौढ कुस्तीगीर आणि अल्पवयीन महिला कुस्तीगीराच्या वडिलांनी केलेल्या तक्रारीच्या आधारे भारतीय कुस्ती महासंघाचे अध्यक्ष आणि भाजप खासदार बृजभूषणसिंह यांच्याविरुद्ध दिल्ली पोलिसांनी दोन एफआयआर दाखल केले आहेत. यात गेल्या दशकभराच्या कालावधीत आरोपीकडून वेगवेगळ्या वेळी आणि परदेशांसह विविध ठिकाणी लैंगिक छळ, अयोग्य स्पर्श, टोमणे मारणे, पाठलाग करणे आणि धमकावण्याच्या अनेक घटनांचा समावेश आहे.अल्पवयीन महिला कुस्तीगीराच्या वडिलांच्या तक्रारीवरून दिल्ली पोलिसांनी २८ एप्रिलला कॅनॉट प्लेस पोलिस ठाण्यात दोन एफआयआर नोंदवले होते. यापैकी एक एफआयआर हा लैंगिक छळापासून मुलांचे संरक्षण (पोक्सो) कायद्यांतर्गत आहे. यामध्ये दोषी आढळल्यास आरोपीला सात वर्षांच्या तुरुंगवासाची शिक्षा आहे. सर्वोच्च न्यायालयाच्या आदेशानंतर नोंदवलेल्या एफआयआरमध्ये बृजभूषण यांच्यावर विविध भादंवि कलमांखाली आरोप ठेवण्यात आले आहेत. यात महिलेचा विनयभंग (कलम ३५४), लैंगिक छळ (३५४ अ), पाठलाग (३५४ ड) यांचा समावेश असून, यांत दोन-तीन वर्षांपर्यंत तुरुंगवासाच्या शिक्षेची तरतूद आहे.काही तक्रारकर्त्यांनी असाही आरोप केला, आहे की बृजभूषण यांनी त्यांना त्यांच्या करिअरसाठी मदत करण्याचे आश्वासन देऊन त्यांचा लैंगिक फायदा घेण्याचा प्रयत्न केला. सहा कुस्तीगीरांनी दाखल केलेल्या एफआयआरमध्ये भारतीय कुस्ती महासंघाचे सचिव विनोद तोमर यांचे नावही आरोपी म्हणून देण्यात आले आहे.
