म. टा. विशेष प्रतिनिधी, मुंबई : येत्या सोमवार आणि मंगळवारी मुंबईत तुरळक ठिकाणी मुसळधार पाऊस पडण्याची शक्यता शुक्रवारी प्रादेशिक हवामान विभागाने वर्तवली. येत्या तीन ते चार दिवसांमध्ये महाराष्ट्राच्या आणखी काही भागांमध्येही मान्सूनची प्रगती होईल, असा अंदाज आहे. २३ जून रोजी विदर्भाच्या काही भागांमध्ये मान्सून दाखल झाल्याचेही भारतीय हवामान विभागाने स्पष्ट केले.सध्या कोकण किनारपट्टीवर सातत्यपूर्ण पश्चिमी वाऱ्यांमुळे तापमान वाढले आहे. रात्री जमिनीकडून समुद्राकडे वाऱ्यांचा प्रवास होणे अपेक्षित असते; मात्र तसे न होता रात्रीही समुद्रावरूनच वारे येत असल्याने कमाल तापमानाचा पारा सरासरीपेक्षा चढा आहे. प्रादेशिक हवामान विभागाने दिलेल्या जिल्हावार पूर्वानुमानामध्ये मुंबईत सोमवार आणि मंगळवारी यलो अॅलर्ट देण्यात आला आहे. या दोन्ही दिवशी मुंबई व ठाण्यात तुरळक ठिकाणी मुसळधार पावसाची शक्यता आहे. पालघर जिल्ह्यासाठीही मंगळवारी यलो अॅलर्ट आहे. रायगड, रत्नागिरीमध्ये आज, शनिवारपासून मंगळवारपर्यंत तुरळक ठिकाणी मुसळधार पावसाची शक्यता आहे. तर सिंधुदुर्गातही सोमवारपर्यंत तुरळक ठिकाणी मुसळधार पावसाचा अंदाज आहे.सध्या मान्सूनची बंगालच्या उपसागरातील शाखा सक्रिय आहे. तर येत्या तीन ते चार दिवसांमध्ये अरबी समुद्रातील शाखाही पुन्हा सक्रिय होऊन तेलंगण, कर्नाटक आणि महाराष्ट्राच्या काही भागांमध्ये मान्सूनचा प्रवास पुन्हा सुरू होण्यासाठी अनुकूल परिस्थिती असल्याचे भारतीय हवामान विभागाने स्पष्ट केले आहे. तर विदर्भाच्या काही भागांमध्ये २३ जून रोजी मान्सून दाखल झाला. बंगालच्या उपसागरातील मान्सून शाखा सक्रिय असून, महाराष्ट्रातील अरबी समुद्राच्या शाखेचा सुरू झालेला प्रवास पुन्हा सक्रिय होण्याआधी मान्सून विदर्भात प्रवेश करेल, असा अंदाज वर्तवला जात होता. हा अंदाज शुक्रवारी भारतीय हवामान विभागाने मान्सून विदर्भात दाखल झाल्याचे जाहीर करून खरा असल्याचे स्पष्ट केले. रिमझिम पावसाची हजेरीमुंबईत शुक्रवारी कुलाबा येथे ३४.६ तर सांताक्रूझ येथे ३४.४ अंश सेल्सिअस कमाल तापमान होते. सकाळी रिमझिम पाऊस पडला; मात्र त्याची नोंद शून्य मिलीमीटर झाली. मुंबई आणि ठाण्यात अनेक ठिकाणी पाच मिलिमीटरपर्यंत पावसाची नोंद झाली. तर एम पूर्व, एफ उत्तर येथे पाच ते दहा मिलिमीटर पावसाची नोंद झाली.
