म. टा. खास प्रतिनिधी, मुंबई : मोबाइल ॲपआधारित आसन आरक्षित करणाऱ्या बेस्टच्या प्रीमियम एसी बससेवेला प्रवाशांनी चांगला प्रतिसाद दिला असून त्यात वाढच होत आहे. ही सेवा सुरू झाल्यापासून गेल्या सहा महिन्यांत तीन लाख प्रवाशांनी ही सुविधा घेत प्रवास केला आहे. या प्रवासामुळे बेस्ट उपक्रमाच्या तिजोरीत तीन कोटी रुपयांचे उत्पन्न जमा झाले आहे.गर्दीच्या वेळी बेस्ट बसगाड्यांना असलेली गर्दी, वेळेत उपलब्ध न होणारी बेस्ट बस हे सर्व पाहता बेस्ट उपक्रमाने मोबाइल ॲपआधारित आरक्षित होणारी, वातानुकूलित व विजेवर धावणारी प्रीमियम बससेवा ठाणे ते वांद्रे कुर्ला संकुल आणि वांद्रे कुर्ला संकुल ते वांद्रे स्थानकदरम्यान १२ डिसेंबरपासून सुरू केली. चलो मोबाइल ॲपद्वारे या बसमधील आसन प्रवाशांना आरक्षित करता येते. या बसचा मार्ग, अपेक्षित वेळ, त्या मार्गावर आणखी किती बससेवा असतील, याची माहिती ॲपवर समजते. सुरुवातीला पहिल्या टप्प्यात एकूण १०० प्रीमियम बस दाखल करण्याचा निर्णय मुंबई महापालिकेने घेतला होता. सध्या ९६ प्रीमियम बस प्रवाशांच्या सेवेत आहेत. ही प्रीमियम सेवा सुरू झाल्यापासून आत्तापर्यंत ३ लाख २० हजार प्रवाशांनी प्रवास केला आहे. तर एकूण तीन कोटी रुपये उत्पन्न बेस्टला झाले आहे. दररोज सरासरी तीन हजार प्रवासी प्रीमियम बसमधून प्रवास करत असल्याची माहिती बेस्ट उपक्रमाने दिली. प्रवासीसंख्येत वाढ झाल्यास प्रीमियम बसगाड्यांच्या संख्येत वाढ करण्यात येईल, असेही उपक्रमाकडून सांगण्यात आले. या मार्गांवर प्रीमियय बसची धावठाणे ते बीकेसी, वांद्रे ते बीकेसी, मुंबई विमानतळ ते कफ परेड, मुंबई विमानतळ ते खारघर, मुंबई विमानतळ ते ठाणे, ठाणे ते पवई, ठाणे ते अंधेरी, गुंदवली ते बीकेसी, खारघर ते बीकेसी, सीबीडी बेलापूर ते बीकेसी, गुंदवली ते मुंबई विमानतळ टर्मिनल (दोन सेवा)
