: दिल्लीतील श्रध्दा हत्याकांड आणि मुंबईतील मिरा रोड येथील सरस्वती हत्या प्रकरण अद्याप कोणी विसरु शकलेलं नाही. त्यात आता दिल्लीत पुन्हा असंच हादरवणारं प्रकरण समोर आलं आहे. हे प्रकरण दिल्लीतील गीता कॉलनी उड्डाणपुलाखालील आहे. जिथे एका मुलीचा मृतदेहाचे तुकडे आढळून आल्याने खळबळ उडाली आहे. मारेकऱ्याने मृतदेहाचे तुकडे वेगवेगळ्या पॉलिथिनमध्ये पॅक करून फेकले होते.कापलेले डोके प्लास्टिक बॅगमध्येदिल्ली पोलिसांना सकाळी नऊच्या सुमारास मृतदेहाचे हे तुकडे आढळल्याची माहिती मिळाली होती. फोन करणाऱ्याने सांगितले की, यमुना नदीच्या काठावरील जंगलात उड्डाणपुलाच्या खाली प्लास्टिकची पाकिटं आहेत, जी संशयास्पद दिसत आहेत. हा फोन आल्यानंतर पोलिस तात्काळ घटनास्थळी पोहोचले. पोलिसांनी प्लॅस्टिकचे पाकीट उघडताच आत एक मानवी शिर आढळून आले. हे शिर पूर्णपणे कुजलेले होते आणि ते ओळखणेही शक्य नव्हते. पण, डोक्यावरील लांबसडक केस बघून हे शिर मुलीचे असल्याचं सांगण्यात येत आहे. कापलेलं शिर जंगलात सापडल्यानंतर पुढील तपास करण्यात आला. पोलिसांनी जंगलात शोधमोहीम सुरू केली. पोलिसांनी यासाठी ड्रोनची मदत घेतली. या प्रयत्नात पोलिसांना यश मिळाले आणि त्याच जंगलातून पोलिसांना आणखी एक प्लास्टिकचे पाकीट मिळाले. हे उघडल्यावर त्यात आणखी अनेक छोटी पाकिटं सापडली आणि त्यात मानवी शरीराचे तुकडे होते. हे सर्व तुकडे एकाच व्यक्तीचे असल्याचा पोलिसांना संशय आहे, ज्याच्या हत्येनंतर मारेकऱ्याने त्याचे तुकडे केले आणि त्याला जंगलात फेकून दिलं.पोलिसांनी पॉलिथिनमध्ये सापडलेल्या मृतदेहाचे तुकडे जप्त केले आहेत. परंतु या तुकड्यांमध्ये अशी कोणतीही वस्तू नाही ज्याने मृतदेहाची ओळख पटू शकेल. या प्रकरणाचा तपास पुढे नेण्याचं मोठं आव्हान पोलिसांसमोर आहे. सध्या पोलिस या मुलीची ओळख पटवून घेण्याचा प्रयत्न करत आहेत.मध्य दिल्लीचे जॉइंट सीपी परमादित्य सिंग यांनी सांगितले की, पोलिसांनी जप्त केलेले तुकडे पोस्टमॉर्टमसाठी पाठवले आहेत. पण, ज्या पद्धतीने या मुलीची हत्या करण्यात आली आहे, ती श्रद्धा हत्याकांडासारखीच आहे. पोलीस मृतदेहाची ओळख पटवण्याचा प्रयत्न करत आहेत. याप्रकरणी सध्या कोतवाली पोलिस ठाण्यात खुनाचा गुन्हा दाखल करून पोलिसांनी तपास सुरू केला आहे. हा खून दुसऱ्या ठिकाणी झाल्याचा संशय पोलिसांनी व्यक्त केला. त्यानंतर मारेकऱ्याने मृतदेहाचे तुकडे प्लास्टिकच्या पिशवीत बांधून यमुनेच्या काठावर टाकले.
