नाशिक : काही महिन्यांपासून कौटुंबिक कलहातून दाखल केलेल्या तक्रारीवरून पती-पत्नीचे शहर पोलीस आयुक्तालयाच्या ‘भरोसा सेल’मध्ये समुपदेशनाचे सत्र पूर्ण झाल्यानंतर विवाहितेच्या मामाने भाचेजावयावर थेट चाकूहल्लाच केला.चक्क पोलिसांसमोरच तरुणाला भोसकण्यात आल्याने पुन्हा गुंडागर्दीने पोलिसांना आव्हान दिल्याचे अधोरेखित झाले. या प्रकरणी संशयित नानासाहेब नारायण ठाकरे (रा. पंचशीलनगर) याला त्वरित पोलिसांनी ताब्यात घेतले. त्याच्यावर खुनाच्या प्रयत्नाचा गुन्हा नोंदविण्याचे काम रात्री उशिरापर्यंत सुरू होते. पंधरा दिवसांपासून शहरात वाढत्या गुन्हेगारीमुळे पोलिसांनी चौक बैठकांसह संशयितांची धरपकड करून स्वत:ची पाठ थोपटण्याचा प्रयत्न सुरू केला आहे. मात्र, त्याचवेळी संशयित ठाकरे यांनी शरणपूररोड पोलीस चौकीजवळच्या सहाय्यक आयुक्तांच्या कार्यालयाशेजारील ‘भरोसा सेल’बाहेरच प्राणघातक हल्ला केला. शुक्रवारी (दि. २८) दुपारी चार वाजेच्या सुमारास ही घटना घडल्यानंतर शहरात खळबळ उडाली. या हल्ल्यात विवाहितेचा पती संतोष पंडित अहिरे (वय ३४, रा. दहिवड) हा गंभीर जखमी झाला. ठाकरेने त्याच्या पोटात चॉपर खूपसल्याने अतिरक्तस्त्राव झाला. पोलिसांनी अहिरेला त्वरित जिल्हा रुग्णालयात दाखल केले. त्याची प्रकृती स्थिर असून, पोलिसांनी या प्रकरणी संशयितावर खुनाच्या प्रयत्नाचा गुन्हा नोंदविण्याची प्रक्रिया सुरू केली.काय आहे प्रकरण?संतोष अहिरे याचे दीड वर्षापूर्वी नाशिकच्या तरुणीशी लग्न झाले. त्यांना आठ महिन्यांची मुलगी आहे. अहिरे हा देवळा तालुक्यातील दहिवडमध्ये टीव्ही, टेपरेकॉर्डर आदी दुरुस्तीची कामे करतो. दरम्यान, संतोष व त्याची पत्नी पौर्णिमा यांच्यात काही महिन्यांपासून कौटुंबिक कलह सुरू आहेत. त्यातून वैतागलेली पत्नी काही महिन्यांपासून तिचा मामा संशयित नानासाहेब ठाकरे याच्याकडे वास्तव्याला आहे. मुलगीदेखील पत्नीसमवेत राहते. या प्रकरणी पोलिसांत तक्रार दाखल अर्जावरून ‘भरोसा सेल’मध्ये कौटुंबिक समुपदेशन सुरू आहे. या प्रकरणात दोन समुपदेशन पूर्ण झाल्यावर तिसरे सत्र शुक्रवारी घेण्यात आले. त्यावेळी पती-पत्नी व संशयित मामा यांच्यात किरकोळ मतभेद पुन्हा उफाळले. त्यातून रिक्षाचालक असणारा संशयित ठाकरे याने थेट संतोषच्या पोटातच चॉपर खुपसल्याने खळबळ उडाली.
