बेंगळुरू : भारतीय संघाने पेनल्टी शूटआउटमध्ये कुवेतवर ५-४ने मात करून सॅफ फुटबॉल स्पर्धेचे विजेतेपद पटकावले. भारतीय संघ या स्पर्धेत नवव्यांदा चॅम्पियन ठरला. भारताने यापूर्वी ही स्पर्धा १९९३, १९९७, १९९९, २००५, २००९, २०११, २०१५, २०२१मध्ये ही स्पर्धा जिंकली आहे. यात भारताचा गोलकीपर गुरप्रितसिंग संधूने उत्कृष्ट बचाव करून भारताच्या विजयात मोलाचा वाटा उचलला. उपांत्य फेरीतही संधूने शूटआउटमध्ये भक्कम बचाव केला होता.कस पाहणारी लढतकंठीरवा स्टेडियममध्ये ही फायनल रंगली. या लढतीसाठी चाहत्यांचा मोठा प्रतिसाद भारतीय संघाला मिळाला. फिफा क्रमवारीत भारत १००व्या, तर कुवेत १४१व्या क्रमांकावर आहे. मागील चार आंतरराष्ट्रीय लढतीत कुवेतने दोन वेळा भारताला नमविले होते, तर एक लढत भारताने जिंकली होती आणि एक लढत बरोबरीत सोडविली होती. याच स्पर्धेत भारत-कुवेतमधील लढत १-१ अशी बरोबरीत सुटली होती. त्यात भारताने उपांत्य फेरीत लेबनॉनवर पेनल्टी शूटआउटमध्येच मात केली होती. त्यामुळे सुनील छेत्रीच्या नेतृत्वाखालील भारतीय संघाचा कस लागेल, हे निश्चित होते. आणि घडलेही तसेच.निर्धारित वेळेत बरोबरीदोन्ही संघांनी आक्रमक खेळ केला. मात्र, मुबारक अल फानिनी आणि अबुल्ला अल ब्लाउशी यांनी उत्कृष्ट चाल रचली. त्यांनी दिलेल्या पासवर शाबैब अल् खल्दीने चौदाव्या मिनिटाला गोल करून कुवेतला आघाडी मिळवून दिली होती. याच्या नऊ मिनिटानंतर लालिॲन्झुला चेंगटेचा गोल कुवेतचा गोलकीपर अब्दुल रहमानने रोखला. यानंतर ३९व्या मिनिटाला चेंगटेने गोल करून भारताला बरोबरी साधून दिली. मध्यंतरापर्यंत ही बरोबरी कायम होती. उत्तरार्धातही दोन्ही संघांनी तोडीस तोड खेळ केला. दोन्ही संघांना गोल करण्याच्या संधी मिळाल्या. मात्र, या संधींचे सोने काही करता आले नाही. यानंतर ३० मिनिटांच्या अतिरिक्त वेळेतही नाट्यमय घडामोडी घडल्या. यात खेळाडूंना दुखापती झाल्या, काहींना यलो कार्ड्स मिळाले. कॉर्नर मिळाले. मात्र, दोन्ही संघांकडून गोल झाला नाही. त्यामुळे पेनल्टी शूटआउटचा अवलंब करण्यात आला. यातही ४-४ अशी बरोबरी झाली. सडनडेथमध्ये भारताने ५-४ असा विजय मिळवला. यात भारताचा गोलरक्षक गुरप्रीतसिंग संधूने हजिआचा गोल अडविला आणि भारतीय खेळाडूंसह चाहत्यांनी एकच जल्लोष केला.
